Charter Document - 03400374

Universis sancte matris ecclesie filiis Robertus miseracione divina Sarr ecclesie minister et eiusdem loci capitulum salutem in domino sempiternam Nobilis memorie domina Emelina de Lascy quondam comitissa Wlton dudum defuncta dum adhuc in rebus ageret humanis zelo fidei et devocionis accensa cultum intendens ampliare divinum capellam quamdam pro anime sue et animarum antecessorum et successorum suorum salute in honore beate Katerine virginis in curia sua de Wanberg construxit in qua certum numerum presbiterorum ordinavit sub certa forma ad eorumdem sustentacionem competenter ibidem in terris et possessionibus assignans porcionem prout in carta ipsius super hoc confecta ac per nos approbata specialiter et confirmata plenius continetur Processu vero temporis eadem domina cogitans ulterius de suppremis et ordinans de extremis testamento suo legitime condito ad construend[um] hospitale quoddam in loco competenti pro suorum executorum dispositione et ad providend[um] ibidem de sustentacione presbiterorum et necessitatibus pauperum et egenorum maximam partem substancie sue pia et provida intencione dereliquit in eodem post cuius obitum exsecutores testamenti ipsius attendentes quod bona ipsius defuncte ad novi hospitalis fundacionem commode non sufficerent quodque in loco predicto de Wanberge feliciter iam cepto et competenter dotato facilius et commodius de augmento sacerdotum hospitalitatis et elemosinarum provideri posset locum ipsum de bonis ipsis ampliare decreverunt et sic de quadam pecunie quantitate quam tunc habebant ad manum porcionem quandam terre apud Ruffynwyk et Ordeston in parochia de Assebur in augmentum unius presbiteri et elemosinarum nostro concurrente assensu a domino Ada de Hylleye emerunt cuius cartam inspeximus in hec verba [] Nos igitur cartam et donacionem huiusmodi ratam habentes et acceptam ipsam approbamus ratificamus et confirmamus per presentes de assensu et expressa voluntate exsecutorum predictorum et custodis capelle predicte statuentes quod terra ipsa ad sustentacionem unius presbiteri in eadem capella ad dispositionem custodis eiusdem ministrantis cedat inperpetuum et quod idem custos nichilominus de terra ipsa unam marcam ad vesturam seu calciamentum pauperum exhibeat annuatim et viginti solidos die anniversarii dicte comitisse pauperibus distribuend[os] Ita quod custos ipse liberam administrationem terre eiusdem sicut aliarum ad capellam ipsam pertinencium habeat et eidem capellano pro ipsa sicut et ceteris secundum formam prime ordinacionis provideat et eciam supradictas elemosinas sicut predictum est sustineat de eadem ipsum quoque capellanum fide anno in annum ammoveatur sicut et ceteros archid[iacono] loci in capite anni presentet sacramentum obediencie prestiturum In cuius rei testimonium presentem cartam fieri fecimus ad modum cyrographi bipartitam ita quod una pars in thesaur[aria] ecclesie nostre et alia penes custodem et capellanos predictos remaneat quibus sigilli nostri una cum sigill[is] exsecutorum ac custodis predictorum in signum sue approbacionis ratificacionis et consensus sunt apposita ad memoriam futurorum Dat apud Remmesbir secundo idus Iunii anno gratie MCC octuagesimo pontificatus nostri anno sexto