Charter Document - 00380295

Walterus dei gratia Lincol[] episcopus dilectis in Christo filiis omnibus archidiaconis et officialibus eorum in [episcopatu] Lincol[] constitutis salutem gratiam et benedictionem Quanto propinquius et familiarius decanus et Lincoln[] capitulum uidentur nobis pre ceteris filiis nostris adherere tanto firmius et plenius uolumus iura eorum in omnibus illibata et integra conseruari ne pro defectu nostro debeant aliquid incommodum sustinere Inde est quod uestram prudentiam attentius duximus exhortari districtius mandantes quatinus si quis subditorum uestrorum aliquid de communia Lincol[] ecclesie detinere presumpserit et commonitus eisdem filiis et [cano]nicis nostris satisfacere noluerit in ipsum iusticiam ecclesiasticam infra quindecim dies postquam requisiti fueritis exercere non differatis Si quis autem uestrum in executione huius mandati nostri negligens uel remissus inuentus fuerit noueritis nos in predictum decanum Lincol[] auctoritatem exequendi mandati nostri plenius transtulisse et sententiam quam propter hoc rationabiliter tulerit ratam et inuiolabilem habituros et ut eandem ratam habeatis precipimus Si uero prefatus decanus interesse non poterit eandem auctoritatem in subdecanum uel alium canonicum qui uices eorum in hac parte suppleat duximus transferendam Vobis igitur districtius mandamus ut sententiam quam super hoc rationabiliter dederint ratam habeatis et faciatis usque ad congruam satisfactionem firmius obseruari saluo iure et dignitate nostra His testibus magistro Johanne Cornubia magistro Radulfo Constanciensi Ricardo R[ogero] Nicholao capellanis Willelmo Osberto clericis et multis aliis