Charter Document - 00640128

Notum sit omnibus ad quos presens scriptum pervenerit quod cum auctoritate literarum domini pape Honorii tertii lis esset mota coram magistris S[imone] decano Cicestrensi et R de Lavinton decano et W de Kemeseyam canonico Cicestrensi inter magistrum W[illelmum] de Merton canonicum Sarum personam ecclesie de Farendon petentem ab abbate et monachis de Stanleya nomine prebende sue Sarum ecclesie scilicet de Farendon omnes decimas de dominicis quas dicti monachi habent infra limites parochie de Farendon et prefatos abbatem et conventum asserentes se immunes esse a prestatione dictarum decimarum per privilegia a sede apostolica eis indulta tandem lite inter eosdem contestata provisis etiam attestationibus et habita super eisdem disputatione super predictis inter ipsos amicabilis intervenit compositio talis videlicet quod dicti abbas et conventus de Stanleya dabunt singulis annis persone ecclesie de Farendon qui pro tempore fuerit pro bono perpetue pacis inter ecclesiam Sarum et ecclesiam de Farendon et monasterium de Stanleye reformande nomine decimarum a dicto magistro Willelmo coram decano Cicestrensi et conjudicibus suis predictis petitarum scilicet decimarum tam majorum quam minorum quas dicti monachi habuerunt tempore compositione istius in parochia de Farendon scilicet terrarum pratorum pascuorum necnon et nutrimentorum animalium suorum vel aliarum decimarum quas aliqua ratione vel jure parochiali peti potuerunt ab eisdem centum solidos sterlingorum annuos scilicet ad festum S[ancti] Johannis Baptiste quinquaginta solidos [et] ad Nativitatem [domini] quinquaginta solidos apud Farendon solvendos persone ecclesie de Farendon vel ejus procuratori vel ipsis absentibus super altare ecclesie de Farendon sacerdotibus ipsius ecclesie et aliis adhibitis testibus Ita quod si de cetero alique terre sive rusticorum sive libere tenentium infra limites parochie de Farendon ad manus predictorum monachorum devolvantur ex iis integre et sine diminutione decimas persolvent ecclesie de Farendon ipsam ecclesiam indemnem conservaturi nullo privilegio ad firmarios vel feodatarios eorundem aliquo tempore extendendo Ita tamen quod si dicti monachi ad firmam vel feodum terre sua dederint vel rusticis excolendas interim ecclesia de Farendon integre percipiet decimas de terris ad firmam vel feodum vel rusticis ad excolendum datis et non solvent predicti monachi interim predictos centum solidos annuos et si iterum redierit firma vel feodum vel terre rusticis exculte ad manus monachorum pretaxato modo centum solidos annuos ecclesie de Farendon persolvent pro hac plena immunitate decimarum ut dictum est eis servata Preterea si contingat quod abbas et conventus de Stanley aliquas particulas terrarum suarum quas habuerunt tempore compositionis istius in parochia de Farendon rusticis et aliis concesserint predicto modo excolendas interim monachi predictos centum solidos persolvent et ecclesia de Farendon de illis terris nihilominus decimas integre percipiet Quod si in eorum redierint dominicum ab omni decimarum prestatione monachi remanebunt ut dictum est immunes Ad hec si pensio centum solidorum predicta suis terminis non fuerit soluta vel si compositio predicta ab alterutra partium in aliquo infringatur decanus et canonici in ecclesia Sarum residentes vice totius capituli et decanus Cicestrensis qui pro tempore fuerint habeant sibi plenam concessam potestatem ad compellendum monitione premissa partem renitentem ad observationem predictorum remota appellatione et non obstantibus privilegiis monachorum quantum ad hoc pertinet Similem etiam habeant coercionem ad compellendum partem renitentem ad refusionem expensarum per injuriam vel culpam partis renitentis factarum Si tamen inveniantur terre opportune pretio centum marcarum de unanimi consilio assensu et voluntate episcopi et capituli Sarum et persone ecclesie de Farendon qui pro tempore fuerit necnon et monachorum de Stanley comparande cum terre pecunia eorundem monachorum sic comparate fuerint et in earundem plena et pacifica possessione fuerit ecclesia de Farendon in recompensationem centum solidorum assignatorum predictorum si hoc magis elegerint monachi de Stanlege et honeste fieri possit licebit monachis predictis ex tunc a solutione memoratorum centum solidorum cessare compositione predicta in aliis articulis firma et immobili secundum quod supra scriptum est manente Hanc autem prescriptam compositionem inviolabiliter se observaturos fideliter promiserunt predicti abbas et conventus de Stanlege et dictus magister Willelmus de Merton et ad abundantiorem ejusdem compositionis firmitatem tribus instrumentis super ista compositione confectis sub eisdem verbis et tenore omnino eodem in signum sui consensus et ad eam confirmandam sigilla sua apposuerunt venerabilis pater Ricardus Sarum episcopus et capitulum et judices prefati item abbas et conventus de Stanleye et prefatus magister W[illelmus] de Merton Unum autem predictorum trium instrumentorum remanebit penes ecclesiam Sarum aliud penes monasterium de Stanleye tertiam penes ecclesiam de Farendon Acta anno gratie mccxxi Id[us] Aprilis Testibus Ricardo Sarum episcopo Willelmo [de Wanda] decano Roberto [de Hertford] cancellario Abraham thesaurario et aliis