Charter Document - 00640223

Universis sanctae matris ecclesiae filiis ad quos praesens scriptum pervenerit Henricus [de Lexington] Sarum thesaurarius salutem aeternam in Domino Honestum est et rationi conveniens ut ecclesiarum praelati justis fidelium petitionibus grato concurrant assensu quorum beneficiis ecclesiae se sentiunt honoratas Sane cum dilectus in Christo Rogerus de Stodlege ecclesiae de Calne gratus extiterit et devotus ego precibus ejus inclinatus considerans locorum distantiam discrimina viarum et aquarum inundationum divini cultus ampliandi intuitu sibi et haeredibus suis pro me et successoribus meis concessi ut in perpetuum habeant cantariam in capella sua de Stodlege per perpetuum capellanum suis sumptibus sustentandum mihi et successoribus meis antequam in ipsa divina celebret praesentandum ut si idoneus repertus fuerit sufficientem praestet cautionem de omnibus proventibus ad capellam a quocunque et undecunque venientibus quocunque nomine censeantur matrici ecclesiae fideliter et integre restituendis quod idem Rogerus se fideliter observaturum pro se et haeredibus suis promisit et quod nullus parochianus vel alius admittetur ibidem ad divine vel alia ecclesiastica sacramenta in praejudicium matricis ecclesiae Cavebit etiam capellanus de omnimoda ejusdem indemnitate conservanda insuper quod honeste se habebit et erit obediens canonico de Calna qui pro tempore fuerit et etiam vice sue fungenti in omnibus canonicis mandatis Venient itaque praefatus Rogerus uxor sua capellanus et ministri capellae cum tota libera familia ad matricem ecclesiam haeredes sui et uxores eorum similiter omnibus festis sanctorum Ascensionis Nativitatis beati Johannis Baptistae sanctae Mariae Magdalenae et Assumptionis beatae Mariae ibidem audituri divina et facturi quod festorum solemnitas poposcerit nulla missa dictis diebus in capella celebrata nisi de voluntate et licentia thesaurarii qui pro tempore fuerit vel ejus assignati tota reliqua familia sua ad ecclesiam de Calna indifferenter accedente Concessi etiam ipsi Rogero et uxori suae et haeredibus suis et eorum uxoribus solummodo ut confiteantur capellano de Calna apud Stodlege et ibi ab eodem paschalia sacramenta recipiant nisi ad matricem ecclesiam ex devotione voluerint accedere Ac per eundem capellanum ibidem purificentur uxores pueris suis apud matricem ecclesiam baptizatis nisi nutritus necessitas aliter fieri compulerit Et si contigerit pueros ipsorum utriusque sexus ante legitimum tempus condendi testamentum decedere apud matricem ecclesiam sepulturae tradentur facti majores facultatem habeant quo voluerint eligendi sepulturam Ceterum quotiescunque contigerit viros religiosos apud ipsos hospitari transeundo liceat ipsis ibidem divine celebrare Similiter capellanis nobilium apud illos hospitantium Si autem aliquo casu contigerit terram de Stodlege ad manus virorum religiosorum devenire nisi prius obtenta licentia residentium in ecclesia de Calna minime celebretur ibidem Haec autem concessa sunt salvis canonicis de Calna omnimoda coercione [et] jurisdictione in capellam capellanum et ministros capellae Praemissa quoque se inviolabiliter observaturum pro se et haeredibus suis dictus Rogerus tactis sacrosanctis juravit Ut autem praemissa rata permaneant et inconcussa praesenti scripto propter majorem securitatem utriusque partis ad modum cyrographi bipartito sigillum meum apposui venerabili patre domino Roberto Sarum episcopo capitulo et Rogero de Stodlege in testimonium sui consensus et perpetuae confirmationis sigilla sua similiter apponentibus Dat die Jovis proximo post Epiphaniam Domini apud Sarum anno Domini mccxl