Charter Document - 00640245

Omnibus Christi fidelibus praesentes literas inspecturis vel audituris Rogerus divina permissione prior hospitalis S Johannis Bristoll et fratres et sorores ibidem Christo ministrantes salutem et orationum jugem instantiam Universitati vestrae praesentium tenore innotescat quod cum magister Henricus Tessun rector praebendae de Bedminstre [adventum nostrum in parochia de Bedemynstre et domorum nostrarum in eadem parochia constructarum stationem et statum nostrum pro se et successoribus suis canonicis Sarum rectoribus dictae praebendae de Bedemynstre] concederet approbaret pariter et acceptaret nos de consilio dicti magistri Henrici Tessun rectoris dictae praebendae de Bedminstre et aliorum bonorum virorum nobis et domui nostrae in perpetuum praecavere curantes ne aliqua inter nos et ipsius rectoris successores super statu nostro quaestio vel querimonia in posterum posset suscitari concessimus quod occasione cantariae nostrae nobis a sede apostolica concessae nullus parochianorum praebendae de Bedminstre admittetur cum damno ipsius praebendae quod sciamus vel scire possimus ad audiendum ibidem divina nisi solum fratres et sorores domus nostrae et infirmi ibidem decubantes et extranei supervenientes alii parochianis praebendae de Bedminstre Ego autem Rogerus prior dictae domus pro domo nostra dicto magistro Henrico Tessun ut rectori dictae praebendae juramentum obedientiae et fidelitatis super omnimoda ipsius praebendae indemnitate observanda solemniter praestiti et hoc ipsum priores domus nostrae qui pro tempore praeficientur rectoribus dictae praebendae qui pro tempore erunt sine difficultate facient et fideliter observabunt Item hoc ipsum juramentum frater sacerdos et penitentiarius noster quicunque sit ille antequam in officio penitentiali ministret praestabit pro se et pro aliis confratribus suis sacerdotibus coram rectore dictae praebendae quicunque sit ille vel ejus procuratore ad hoc per nos prius interpellato priori domus nostrae quicunque fuerit ille super consimili indemnitate dictae prebendae fideliter et firmiter observanda Item cum nos fratres et sorores nostri domus nostrae aliquem fratrem sacerdotem de domo nostra habere voluerimus penitentiarium nostrum ipsum episcopo Bathoniensi si sit praesentabimus vel archidiacono Bathoniensi si contingat sedem Bathoniensem esse vacantem et cum admissus fuerit et admissio sua rectori dictae praebendae per eundem admissum et per priorem et alios fratres domus nostrae prout decet fuerit ostensa ex tunc confessiones fratrum et sororum domus nostrae et infirmorum extraneorum ibidem decubantium et aliorum supervenientium omnium audiet et poenitentias injunget exceptis parochianis quibuscunque praebendae de Bedeministre quorum confessiones capellanus praebendae de Bedeministre [et] confessiones familiae nostrae secularis omnino terrae domus nostrae signatae et mobilis annuatim audiet et omnia iura ecclesiastica eisdem faciet Item dicta familia nostra in die Natalis Domini in die Parasceves in die Paschatis et in die Assumptionis beatae Virginis ad capellam de Radeclive annuatim veniet et secundum temporis exigentiam jura sua ecclesiastica ibidem recipiet et oblationes suas in die Paschatis et in die Assumptionis beatae Virginis in eadem capella de Radeclive faciet Ad hoc duas libras cerae in vigilia Assumptionis beatae Virginis nomine recognitionis et devotionis annuatim persolvemus dictae capellae de Radeclive Concessit autem dictus magister Henricus Tessun rector dictae praebendae quod domus nostra percipiat oleum infirmorum a capella de Radeclive semel in anno prout antea consuevit percipere Nos siquidem pro nobis et successoribus nostris domino Roberto Sarum episcopo pie et devote concessimus quod post decessum suum anniversarium ipsius secundum temporis cursum cum contigerit cum Placebo et Dirige et animarum commendatione et missa fidelium in domo nostra annuatim celebrari faciemus Eodem modo communi consilio et assensu concessimus dicto magistro Henrico Tessun quod anniversarium suum annuatim sub consimili solemnitate celebrari faciemus Concessit etiam nobis dictus magister Henricus Tessun quod nullus parochianorum praebendae de Bedeministre in domo nostra imperpetuum commoraturus vel ad tempus decubaturus admittatur donec testamentum suum rite et secundum Deum et consuetudinem laudabilem condiderit Ad perpetuam igitur praemissorum securitatem et observationem duo scripta fecimus sub praemissa forma et eisdem sigillum nostrum commune apposuimus quorum scriptorum unum in thesauria Sarum remanebit et aliud penes eum qui pro tempore fuerit rector dictae praebendae de Bedministre His testibus domino abbate S Augustini Bristoll domino Johanne abbate de Keynesham Willelmo clerico Jacob la Ware Willelmo Beaumont Thoma Longo Henrico de Sampford et W de Brokkele et Marciano rectore ecclesiae de Wyly Roberto Pule[y]n Henrico de Molendino Ricardo Bristoll tunc clerico domini archidiaconi Bathoniensis et aliis Acta die S Fidis apud Farleyge in prioratu ejusdem loci anno gratiae mccxliii