Charter Document - 00640256

Viris venerabilibus et dominis in Christo carissimis domino r[oberto] decano et capitulo Sarum frater S prior Malmesbire et ejusdem loci conventus salutem et cum orationum suffragiis reverentiam et honorem Cum venerabilis in Christo pater dominus r[obertus] Dei gratia Sarum episcopus qui fratri g[alfrido] electo nostro diem dominicum proximum post festum Sancti Marci Evangelistae anno gratiae mccxlvi ad benedictionis munus recipiendum in majori ecclesia Sarum diem assignaverat et pergravi et manifesta sui corporis debilitate ad diem et locum accedere non valeat supradictos quia propter dispendia ex dilatione benedictionis praedicto nostro monasterio imminentia nostris precibus inclinati nobis de speciali gratia indulsistis ut non obstante constitutione synodali qua cavetur ne alicui abbati vel abbatissae Sarum diocesi extra cathedralem ecclesiam Sarum benedictionis munus impendatur praefatus clericus noster pro tam urgenti necessitate apud Poterne benedictionem recipiat vice ista Nos cupientes dignitates et constitutiones ecclesiae Sarum matris nostrae conservare per omnia illibatas protestamur et confitemur quod ex hac gratia nihil juris vel quasi possessionis nobis vel successoribus nostris adquirere intendimus per quod dicta constitutio de caetero offendatur In cujus rei testimonium praesens scriptum sigilli nostri munimine fecimus roborari Datum apud Malmesbire anno gratiae mccxlvi die Veneris ante festum S Marci