Charter Document - 00899510

Geste endenture faite le vyntisme quynt iour de Feuerer a Oseneye lan du regne le Roi Edward tierce apres le conqueste trentisme quart entre labbe et Gouent de Oseneye dune part et Walter atte More de Oxenford et Isabelle sa femme dautre part tesmoigne que come lauantdit Wauter est oblige au dit labbe et Gouent en qatre liures dargent par une obligacion destatut de marchant a paier en la fest de seynt Michel proscheyn auenir apres la fesaunce de cestes les ditz Abbe et Gouent grauntent pour eux et lour successours que si les auantditz Wauter et Isabelle facent ou faire facent une seude en Oxenforde en une tenement iouste Iohn de Couyntre bien et couenablement deinz ces oet annz prochenis auenire et un autre maison deinz le dit tenement solonc le purport et effect dune escrit endente fait entre les ditz parties que a donque la dite obligacion de quatre liures destatut marchant serra tenuz pour nulle einz perde sa force a touz iours Et les auantditz Wauter et Isabelle grauntent pour eux lour heyres et lour executours que sils faillont des ditz couenantz que la dite obligacion estoiseen sa force En tesmoignaunce de quele chose les parties susdites a cestes endentures entrechaungeablement ount mys lour seals Don a Oseneye le iour et Ian susditz