Charter Document - 01070018

Cum mota esset contentio inter Priorem et Conventum de Brinkeburne petentes per breve novae disseysinae et Dominum Rogerum Bertram de Mitford et Dominum Robertum de Gamelthorp deforciantes super communa pasturae suae sibi et hominibus suis in parco de Felton et omnibus dominicis culturis de Felton et de parcagio in defenso de averiis ibidem captis per evasionem et de communa pasturae terrae dicti Roberti de Gamelthorpe in Overgares sopita est in hunc modum videlicet quod praedictus Rogerus Bertram de Mitford recognovit et concessit pro se et heredibus suis praedictis Priori et Conventui et successoribus suis et hominibus suis de Magna et Parva Felton communam pasturae in omnibus dominicis culturis suis de Felton excepto dicto parco tunc fossato et incluso Et dicti Rogerus et Robertus recognoscunt et concedunt dictis Priori et Conventui et successoribus suis communam pasturae in terra dicti Roberti de Gamelthorp omnibus diebus anni post blada et foena asportata cum libero introitu et exitu Et habebunt per mediam terram suam liberum introitum et exitum versus pasturam de Rymeside latitudinis quadraginta pedum in loco quo Johannes filius Symonis introitum fieri fecit post feoffationem dicti Roberti Et pro ipsa recognitione et concessione dicti Prior et Conventus concedunt dicto Rogero et heredibus suis quod habeant dictum parcum quietum et liberum ab eis et hominibus suis et successoribus suis ita quod nullum jus vel clamium in dicto parco nomine communae in posterum vendicare poterint Et similiter recognoscunt et concedunt dicto Roberto de Gamelthorp et heredibus suis communam pasturae propriis averiis suis in terram suam de Evenwod post blada et foena asportata cum libero introitu et exitu Et si contingat plures homines terram praedicti Roberti ad firmam tenere nullus communicabit in terra de Evenwod nisi ille qui in dominico tofto dicti Domini Roberti manebit salva tamen tota communa pasturae extra clausturam de Evenwod De parcagio autem sciendum quod si averia dictorum Prioris et Conventus et successorum suorum vel hominum suorum infra dictum defensum evaserint dabunt pro carucata boum unum denarium et pro xx ovibus unum denarium et pro x porcis unum denarium et pro xx aliis averiis unum denarium et pro uno equo seu equa unum obulum Et si pauciora averia capta fuerint talliabuntur donec veniatur ad numerum singulorum Praeterea sciendum quod omnes forestarii et messarii dicti Rogeri jurabunt singulis annis die Sancti Michaelis apud Felton coram ballivo domini et celerario vel alio attornato dictae domus de Brinkeburne quod maliciose vel injuste non vexabunt vel inparcabunt dictos Priorem et Conventum vel homines suos vel averia sua Et pastores dictorum Prioris Conventus et hominum jurabunt similiter quod pro posse suo averia sua custodient ita quod dictum defensum non intrabunt nisi ipsis invitis Et ut haec conventio rata et stabilis permaneat dicti Rogerus Bertram et Robertus de Gamelthorp parti cirographi Prioris et Conventus sigilla sua apposuerunt et dicti Prior et Conventus pro se et successoribus suis et hominibus parti cirographi dictorum Rogeri et Roberti sigillum capituli sui apposuerunt Hiis testibus Willelmo Heyron tunc vicecomite Northumbriae Johanne filio Symonis Thoma de Fenwyk Hugone Gubiun Roberto de Camhou Wydone de Araynis Johanne de Eslyngton Nicholao de Aketon Johanne de Woderington Alexandro de Titlinton Hugone Vigerus Willelmo Blumvill Willelmo de Espley et aliis Actum apud Novum Castrum super Tynam in itinere Rogeri de Thurkelby et sociorum suorum die Lunae proxima post festum Sancti Johannis ante Portam Latinam anno gratia mcc quinquagesimo vj