Charter Document - 01510187

Robertus dei gratia Lincolniensis episcopus universis catholice ecclesie filiis salutem Universitati vestre innotescimus Danielem presbiterum in manu nostra personatum ecclesie de Sulgravechirch refutasse et nos episcopali qua fungimur auctoritate eiusdem ecclesie personatum dilecto filio nostro Radulfo priori Norht et fratribus suis monachis beati Andree assignasse et in perpetuam elemosinam quia ius illius ecclesie competebat eandem assignasse Verum quia caritatis intuitu prefato Danieli providere disponebant sub presentia nostra eidem quamdiu in habitu seculari viveret perpetuam in eadem villa concesserunt vicariam videlicet quod idem Daniel prefatam ecclesiam nomine prioris et monachorum beati Andree tamquam perpetuus vicarius possidebit et beneficia eiusdem ecclesie etiam percipiet exceptis de dominio decimis quas prior et monachi plene et integre in omnibus percipient a quocumque terre dominice prefate ville excolantur et pro istius ecclesie beneficiis sicut supradictum est priori et monachis annuos persolvet xx solidos in natali domini v solidos in termino pascali v solidos in festo beati Iohannis Baptiste v solidos in festo beati Michaelis v solidos Iura vero episcopalia et officialium nostrorum idem Daniel persolvet et unam virgatam terre quam prior et monachi ei cum vicaria concesserunt in omnibus aquietabit Hec itaque se observaturum fide interposita in manu nostra firmavit Si forte domino inspirante vitam in habitu monastico mutare voluerit ipsum tanquam fratrem in monasterio beati Andree suscipient Teste Rogero filio Willelmi Willelmo Clemente Willelmo capellano et Laurentio