Charter Document - 01510222

Robertus dei gratia Lincolniensis episcopus universis sancte ecclesie fidelibus salutem et episcopalem benedictionem Ab ecclesie nascentis exordio possessiones ecclesiastice fidelium largitione creverunt cuius consolatione sancte religionis conventus in dei servitio sustentatur Unde et in loco qui Divise dicitur iuxta Rokingham ecclesia in honore dei et beate dei genetricis Marie constructa ex munere Willelmi Butevileyn sue fundationis sumpsit initia ad felicem consumationem deo annuente perventura Et quoniam ex iniuncto nobis incumbit officio ea que sub iure nostro sunt quantum in nobis est ecclesiastica tueri beneficia prefate ecclesie de Divisis et fratribus Cisterciensis ordinis ibidem deo famulantibus confirmamus et episcopali auctoritate roboramus ipsum locum in quo prefata ecclesia sita est sicut ab ipso Willelmo eiusdem loci fundatore datus est et regia carta confirmatus cum tota terra quam ipse Willelmus tenuit in Pipewell tam in bosco quam in plano quam ipse dedit ecclesie concessu domini sui Simonis de Wahella et cum tota terra quam habent monachi ex dono ipsius in territorio de Cotesbroc et Michelehaga quam habent ex dono Hugonis Waac et Radulfi de Savenia et Effahagam quam dederunt Robertus filius Lancelini et Willelmus heres eius et aliam Effahagam quam dedit Simon Malesoures et Rahagam quam dederunt Reginaldus Basset et Robertus filius eius et molendinum de Rutewell quod idem Rainaldus Basset et Rogerus de Bordell et Matth uxor illius filia eiusdem Rainaldi dederunt et heremitorium quod vocatur Aquella iuxta Bricastoc et landas que sunt in circuitu eiusdem heremitorii sicut rex eis concessit et dedit Hec et omnia alia que predicte ecclesie fratres ad sue comodum ecclesie canonice adepti sunt vel in futuro deo propitio adipisci poterunt salva in omnibus sancte Lincolniensis ecclesie dignitate episcopali auctoritate confirmamus et presentis scripti munimine rata inperpetuum permanere sancimus Valete