Charter Document - 01950072

Ricardus dei gratia Cantuariensis archiepiscopus totius Anglie primas et apostolice sedis legatus universis sancte matris ecclesie filiis ad quos presentes litere pervenerint salutem in domino Universitati vestre notum fieri volumus quod cum querimonia dilectorum filiorum nostrorum Godardi rectoris ecclesie de Slyndon et Alexandri capellani eiusdem ecclesie vicarii ad nos pervenisset de eo quod ministri nostri ecclesie libertatem et iura in bosco et in pasturis et in aliis coartarent et eis que solebant habere denegarent quia nobis per cartam Teobaldi Cantuariensis archiepiscopi ipsi Godardo cum antedicta ecclesia datam de iure et libertatibus ecclesie plene non constabat diligenti examinatione fidelium et proborum virorum tam clericorum quam laicorum didicimus quod temporibus militum qui villam de Slyndon tenuerunt ante prenominatum Teobaldum et gloriosum martirem Thomam habuit predicta ecclesia sine aliqua contradictione quando voluit de bosco eiusdem ville omnia que fuerant ei necessaria et ubique in pasturis ad eandem pertinentibus cum instauro dominorum libere quiete et sine contradictione de iure ecclesie duos equos octo boves sexaginta oves agnos in bladis porcos quotquot habebat in stipulis et in tempore pannagii decem porcos liberos et quietos in illa villa et in walda quinque similiter liberos et quietos De bosco vero infra septa camporum parochianorum rectores dicti monasterii ad dilatandam terram dicte ecclesie quantum voluerint assartare ubique poterint Et in villa per domos et conduticias in fundo ecclesiastico erectas et omnibus aliis iustis modis quibus possunt redditus suos eis licuit ampliare dum tamen emolumentum proveniens propriis ecclesie usibus accresceret Et si quid animal adventivum vel aliqua alia res super terram ecclesie primo fuisset inventa nisi aliquis suam esse coram rectore dicti monasterii legitime probaret domini fundi nichil sibi vendicantes eam rectoris ecclesie memorate esse iudicabant Homines vero de ecclesia tenentes sibi necessaria de communi bosco eiusdem ville capientes et communam pasture cum aliis hominibus de villa habentes nec ad curiam dominorum fundi veniebant aut aliquod servitium ex toto anno eis faciebant nec in aliquo eis respondebant Nos siquidem in preiudicium iuris et libertatum dicte ecclesie nichil facere cupientes set illesas per omnia custodire volentes paupertati eius compatiendo salvo iure Cantuariensis ecclesie necessitati sue inperpetuum subvenire desiderantes eas potius augere quam diminuere sudavimus Et quia multi sunt deo et ecclesie Christi ministrantium inpugnatores ecclesiasticique iuris multi inveniuntur oppressores ne iura et libertates ecclesie que ecclesie Christi a Christi fidelibus in perpetuam elemosinam divine pietatis intuitu canonice sunt concesse et ab ea longa antiquorum temporum diuturnitate possesse calumniantium versutiis possint in irritum revocari necessarium duximus eas scriptorum autenticorum patrocinio testium subscriptione communire Ea propter volumus in communem notitiam devenire nos concessisse et presenti scripto confirmasse ecclesie de Slyndon curiam et duas virgatas terre quas ab antiquis temporibus possedit cum omnibus pertinendis suis et iura et libertates eius prenominatas quibus gavisa est per maxima preteritorum temporum curricula cum decimis assartorum que de cetero in illa fient parochia et cum decimis predicti pannagii cuiuslibet venditionis bosci cuiuslibet herbagii venditi et omnium provenientium et omnium emolumentorum que nostris et successorum nostrorum temporibus poterunt evenire unde decima magna vel parva possit surgere sine omni contradictione de bosco de pasturis et omnibus aliis rebus habendas et inconcusse perpetuo iure possidendas Et quoniam ea que ad honorem dei et augmentum iuris et libertatum ecclesiarum canonice fieri dinoscuntur firma debent permanere et inconcussa stabilitate roborari volumus et firmiter statuimus ut omnes rectores ecclesie de Slyndon inperpetuum bene libere quiete pacifice et cum omni integritate omnia predicta sicut antiquitus habuit ecclesia teneant et nulla interruptione seu contradictione interveniente possideant sub anathemate prohibentes ne quis prefate ecclesie rectores vel homines suos super ulla possessione sua et iure et libertatibus ecclesie diu ante tempora nostra iuste collatis bona fide canoniceque possessis vel aliis eidem ecclesie a nobis de novo recte ac pie datis iniuste et temere presumpserit inquietare Hanc autem concessionis et confirmationis nostre paginam ut firma et inconcussa permaneat sigilli nostri appositione communivimus in die Translationis sancti Benedicti quo memoratam ecclesiam dedicavimus et crofta quam Sefridus surdus tenuit ei in dotem quiete et libere inperpetuum dotavimus De dei igitur misericordia confisi omnibus qui ad predictam ecclesiam dicto die oraturi devote advenerint et ei aliquod beneficium caritative impenderint vere confessis et penitentibus de iniuncta sibi penitentia singulis annis decem dies rellaxamus Hiis testibus magistro Gerardo Pucella et aliis []