Charter Document - 01950185

Ricardus dei gratia Cantuariensis archiepiscopus totius Anglie primas et apostolice sedis legatus universis Christi fidelibus salutem Causa que inter monachos de Rading et canonicos de Bristold ad Sanctum Augustinum apostolica fuit auctoritate venerabili fratri nostro R Hereford episcopo et dilecto filio S abbati Sancti Albani commissa eisdem fratribus assidentibus sub presentia domini regis Henrici secundi et nostra et aliorum quamplurium religiosorum virorum sub hac transactionis forma conquievit videlicet quod iamdicti canonici Sancti Augustini de Bristold ecclesias de Berkelaihernesse cum universis ad eas pertinentibus que ipsis canonici tempore inite transactionis vel aliquis eorum nomine possidebat nomine monachorum de Rading perpetuo possidebunt solvendo monachis pro ipsis ecclesiis annuas xx marcas in perpetuum x ad Pascha et x ad festum sancti Michaelis Cum autem de assensu utriusque partis fuerit ut ea que a monachis Gloecestrie vel aliis detinentur sive ecclesie sint sive alia beneficia de Berkelaihernesse mediante iustitia revocentur ad eorum revocationem sumptus pro equis portionibus debebunt ab utraque partium ministrari et quicquid per sententiam evincere vel pace interveniente potuerint revocare in usus communes tam monachorum quam canonicorum pro mediis portionibus cedet ad hec sciendum quod memoratus dominus rex de solutione iamdictarum xx marcarum quoad Henricus Exoniensis archidiaconus vixerit ita provisurus est quod et monachi de Rading singulis annis a prenominatis canonicis singulis annis sine difficultate eas percipient et canonicorum indempnitati providebitur Hec autem transactio facta fuit anno dominice incarnationis mclxxv Sicut igitur a predictis fratribus nostris Herefordensi episcopo et abbate Sancti Albani apostolica auctoritate qua fungebantur et scripto eorum auctentico quod oculis nostris perspeximus eadem transactio fuit confirmata sicut etiam in presentia nostra eam fuisse factam recolimus auctoritate qua fungimur eam communimus et corroboramus quatinus tantorum testimoniorum vallata presidiis nullis in posterum possit perversionibus perturbari Testibus magistro Gerardo domino Roberto de Novo Burgo Walerano archidiacono Baiocensi Amico archidiacono Rothomagensi et aliis multis