Charter Document - 01950223

Universis sancte matris ecclesie filiis ad quos presentes littere pervenerint Ricardus Cantuariensis ecclesie minister humilis eternam in Christo salutem Cum ex iniuncto nobis cure pastoralis officio omnium subditorum nostrorum profectibus intendere debeamus viris tamen religiosis tanto propensiori cura providere tenemur quanto minus suo inhibente proposito circa exteriora possunt occupari Attendentes siquidem dilectorum filiorum nostrorum devotionem monachorum de Waleden pariterque sui monasterii novitatem quod licet paucis ad modum dotatum redditibus mirifica tamen structura in honorem gloriose dei genetricis et virginis Marie et beati Iacobi apostoli ex elemosinis et impendiis fidelium videtur consurgere ipsos et prefatum locum cum omnibus pertinentiis et possessionibus quas vel in presenti habent vel futuris temporibus iustis modis poterunt adipisci sub protectione sancte Cantuariensis ecclesie et nostra recipimus districtius ea qua fungimur auctoritate prohibentes ne quis eorum bona aut iura turbare diminuere vel auferre presumat Rogamus caritatem vestram et attentius exhortamur in domino quatinus intuitu divine pietatis et beate matris domini sanctique Iacobi memoratos fratres et locum suum ametis honoretis et de facultatibus vobis a deo collatis misericorditer prospicere ac promovere curetis ut ad ipso auctore ac retributore omnium bonorum eterne felicitatis premia in celo capiatis Omnibus autem Christi fidelibus qui memoratum locum cum devotis orationibus et elemosinis visitaverint vel in eorum fraternitate ascribi ac recipi meruerint vel in diversis sanctorum festivitatibus processiones que ad monasterium illud fieri solent devote secuti fuerint vere scilicet penitentibus et confessis de misericordia Christi et genetricis sue meritisque sancti Iacobi apostoli confidentes de iniuncta sibi penitentia quindecim dies relaxamus et orationum ac beneficiorum Cantuariensis ecclesie tam in morte quam in vita participes esse concedimus Valete