Charter Document - 02050021

Ego Ansellus decanus et obedientiarius et ego Cristianus officialis Eduensis notum facimus universis presentem cartulam inspecturis quod Renaudus filius Ogerii de Bancis in nostra presentia constitutus precise vendidit et assignavit pretio septem librarum Divionensium Humberto filio domine Sare clerico Eduensi decem solidos censuales in domo sua sita apud Eduam subtus portam Castellanam ante domum Porchet singulis annis in crastino Omnium Sanctorum dicto clerico vel mandato suo imperpetuum sine questione et contradictione aliqua persolvendos a dicto Renaudo vel a quolibet alio qui dictam domum tenebit in posterum vel habebit tali eciam pacto apposito quod si dicta die prefati decem solidi soluti non essent dictus clericus vel mandatum suum in dicta domo posset libere vadiare Hanc siquidem venditionem et assignationem laudaverunt pariter et concesserunt coram nobis Girarda uxor et Guillermeta filia dicti Renaudi et Nicholaus filius dicte Girarde juramento prestito promittentes tam dictus Renaudus quam uxor sua et liberi eorumdem predicti se dictam venditionem in perpetuum ratam et firmam habere et contra eandem nunquam venire sed ipsam dicto clerico vel ejus mandato in pace tenere et contra omnes fideliter et efficaciter garantire Confessi fuerunt siquidem coram nobis Renaudus et uxor ejus predicti dictas septem libras a dicto clerico eisdem numeratas fuisse et integre persolutas Ego vero decanus ad quem prior census dicte domus ratione dicte obedientie dinoscitur pertinere prefatam venditionem et assignationem laudavimus et concessimus In cujus rei testimonium et munimen ad preces et instantiam omnium predictorum ad perpetuam firmitatem presentem cartulam ego decanus sigillo proprio et ego officialis sigillo curie Eduensis fecimus roborari Actum apud Eduam anno gratie MCCXXX quarto mense febroario