Charter Document - 02110041

Ioannes Episcopus servus servorum Dei ad perpetuam rei memoriam decens reputamus et congruum ut cum de gratiis et concessionibus Apostolicis ambigitur quod oraculo Romani Pontificis declarentur dudum si quidem in nostris Apostolatus primordiis omnes dignitates prioratus et preposituras conventuales ordinum quorumcumque tunc vacantes et in posterum vacaturas collationi et dispositioni nostre reservantes declaravimus ex tunc irritum et inane si secus super iis a quoquam quavis authoritate scienter vel ignoranter contigerit attentari Cum itaque post modum nonnulli Cluniac et sancti Benedicti ac ceteri alii quorumdam aliorum Ordinum professores de quorum numero dilectus filius Joannes Bosuaque Monachus Monasterii Fiscanensis dicti Ordinis sancti Benedicti Rothomagensis Dioecesis existit expectativas gratias de Beneficiis Ecclesiasticis cum cura vel sine cura per Monachos dicti Clun Ordinis gubernari consuetis etiamsi inter alia Prioratus prepositure vel Decanatus aut dignitates conventuales existerent ad dilectorum filiorum Cluniac Matisconensis Dioecesis ac quorumdam aliorum Monasteriorum Abbatum necnon Priorum et Decanorum Prioratuum Decanatuum et conventuum ejusdem Cluniacensis Ordinis collationem provisionem presentationem electionem seu quamvis aliam dispositionem communiter vel divisim pertinentibus ipsis in commendam vel titulum conferendi a nobis hactenus reportarint et quidquid expectantes Joannes videlicet predictus Prioratum de Gornayo super Maternam Ordinis Cluniacensis Parisiensis Dioecesis detinet occupatum sibi et forsitan alii eis concessarum gratiarum prefatarum pretextu plerosque ex Prioratibus aliis Decanatibus ac dignitatibus conventualibus eisdem forsitan fuerunt assecuti in Abbatum Priorum Decanorum conventuum Monasteriorum necnon Prioratuum et Decanatuum predictorum ut accepimus non modicum pre judicium atque damnum Nos ad hujusmodi ambiguitatis tollendum dubium in premissis quod omnes gratie supradicte ac nostre littere confecte sive conficiende super illis quod hujusmodi Prioratus preposituras Decanatus ac dignitates conventuales ex nostra scientia nulla hactenus emanarint nosque per litteras et gratias easdem reservationi et decreto prefatis non derogari voluisse sive velle nec Prioratus preposituras Decanatus ac dignitates prefatas sub hujusmoni gratiis atque litteris comprehendi debuisse sive debere authoritate Apostolica ex certa scientia tenore presentium declaramus decernentes per litteras Apostolicas personis quibusvis cujuscumque dignitatis status gradus ordinis vel conditionis existant sub quacumque verborum forma forsan in posterum concedendis ac etiam processus illarum vigore habendos ad conventuales Prioratus preposituras Decanatus sive dignitates prefatas penitus non extendi necnon Abbatem Priores sed Decanos eosdem admittentes aliquem vel aliquos illarum pretextu ad Prioratus preposituras Decanatus ac dignitates hujusmodi aliquatenus non teneri non obstantibus quibuscumque generalibus et derogatoriis clausulis vel in eisdem litteris forsitan consecutis etiamsi de illis de verbo ad verbum presentibus habenda esset mentio specialis necnon aliis contrariis quibuscumque Decernentes insuper prout est irritum et inane si secus super iis a quoquam quavis authoritate scienter vel ignoranter attentatum forsan est hactenus vel imposterum contigerit attentari Nulli ergo omnino hominum liceat hanc paginam nostre declarationis et constitutionis infringere vel ei ausu temerario contraire Si quis autem hoc attentare presumpserit indignationem omnipotentis Dei et beatorum Petri et Pauli Apostolorum ejus se noverit incursurum Datum apud sanctum Antonium extra Muros Florent decimo tertio Kalendas Novembris Pontificatus nostri anno IV