Charter Document - 02173634

Mathildi dilectissime in Christo sorori ac unice filie beati Petri Hugo sancte Lugdunensis Ecclesie servus salutem in charitate non ficta Quamvis sciamus venerabilis domina hoc solum te sapere hoc solum inhiantem te querere quod ad honorem Dei et apostolice sedis pertineat tamen dissimulare non possumus quin ex abundanti pietatem tuam super hoc admoneamus ut sanctis desideriis tuis parvitatis nostre studia adjungamus Scimus quidem qualiter supra femineum modum in virili pectore serventem charitatis flammam concipiens in exemplum sancta sis omnium principum ut cum te que temporali potentia et opibus affluebas cuncta pro nomine Domini expendisse et mundi furorem potestatemque tenebrarum fidei armatura evicisse cognoverint similiter se et non fecisse erubescant et facere prompta devotione non dubitent Sed inter hec dilectissima domina ad mentem tibi sepe reducendum est ut in omnibus modis contendas usque in finem perseverare et gloriosa principia feliciori consummatione perficere quia sicut prudentiam tuam per Spiritum edoctam cognoscimus tunc salutis et premiorum certa fiducia est cum usque in finem sancti propositi perseverantia dilatatur Habetis siquidem in hac re fidissimos adjutores et benignos devotionis vestre apud Dominum commendatores piissimum scilicet Patrem nostrum sancte memorie papam et beatum A[] Lucensem episcopum qui sicut cum adhuc viverent in omni pietate et justitia vos instruxerunt ita nunc ab illo eterne quietis sinu in quo eos receptos esse confidimus meritis suis et precibus charitatis vestre opera commendabunt ac amorem perpetue vita quo ineffabiliter satiantur devotionis vestre visceribus in spirabunt Eorum itaque patrociniis adjuta in consulendo Romane Ecclesie totis viribus accingimini summopere providentes ut talem ibi personam eligi consentiatis in qua possit esse et tantorum laborum finis et animarum salus inimicorum confusio et apostolice reparatio dignitatis Et nos quidem licet de recuperatione electionis domni abbatis montis Casini a quibusdam sancte Ecclesie Rom[] episcopis et cardinalibus presbyteris dissenserimus unde aliquibus illorum cur nobis aliter videretur etiam apud Capuam palam rationes reddidimus tamen scire vos volumus ab unitate eorum qua in corpore sancte Ecclesie ad serviendum beato Petro divina dignatione compacti sumus nec discessisse nec in perpetuum Deo miserante discessuros imo habere propositum apostolice sedis profectibus modis omnibus deservire Preterea notificamus unanimitati vestre a monachis Cluniacensibus nobis tantas supergressiones et injurias inferri ut nullo modo eas equanimiter sustinere valeamus Et quidem anno preterito antequam Roman tenderemus compertum nobis fuerat abbatem in sancta Parasceve orationem quam pro imperatore facere consueverat que nunc pre excommunicatione et depositione Henrici a domino papa Gregorio facta interposita est publice celebrasse de quo cum eumdem ad rationem posuissemus conscientia debilitatus respondit orationem illam pro imperatore quolibet se dixisse Cumque ex circumstantia ipsius orationis ad Romanum eam specialiter pertinere imperium prosequeremur quia ex apostolice sedis judicio nunc vacaret veritate oppressus conticuit neque tamen debita penitentia errorem cognitum emendavit Post reditum vero nostrum cum effrenate invasioni monachorum suorum resistere conaremur objecit nobis quasdam litteras quas dicebat a papa Urbano sibi directas in quibus continebatur ut tam ipse quam sancti fratres sui a communione nostra et Ricardi Massiliensis abstinere curarent ut sub pretentione litterarum nostras inexistente injurias retineret Que littere contra apostolicum moderamen et gravitatem condite manifesta mendacia continebant A tempore enim electionis que de abbate Casinensi facta est usque ad conventum Capue habitum integri anni spatium protestantur exactum cum verum sit in eo spatio nullatenus annum integrum evolutum Inter alia autem unum impudentissime mentiuntur quia a communione Romane Ecclesie nos sponte nostra sejunximus cum testis nobis sit conscientia nostra et charitas qua in Domino copulamur nos non solum communionem eorum non evitasse sed omnibus hoc persuadentibus restitisse Adhibito ergo nobis confratrum et coepiscoporum nostrorum consilio et per eorum manum inter nos et abbatem colloquio constituto cum intelligeret nos aliter cum illo concordiam non habituros nisi culpa cognita prefatam orationem interponeret judicium nobiscum subire pretensis multis occasionibus recusavit episcoporum tamen qui aderant studiis discordia nostra aliquantulum modificata est et per inducias usque ad prefinitum terminum mitigata Hec de his que circa nos sunt charitati vestre communicavimus invicem postulantes ut si quid vobis de servitio humilitatis nostre placuerit sine hesitatione nobis hoc summopere cupientibus assignetis Si vero presentium portitoribus Romam eundi occasio aut facultas defuerit de benignitate vestra plurimum confidentes rogamus ut litteras quas illis perferendas commisimus episcopis sancte Ecclesie Romane filiis et cardinalibus presbyteris celeriter dirigi faciatis De cetero dilectum fratrem nostrum domnum Rotgerum sancte Ecclesie apostolice sedis cardinalem subdiaconum qui in proximo Romam per vos ad utilitatem sancte Ecclesie venturum se dicit nobilitati vestre sicut necessarium commendamus rogantes ut in conductu et in ceteris in quibus benignitatis vestre consilio indiguerit pro gratia beati Petri et nostra subveniatis quo referente de his que circa nos sunt plenius cognoscetis