utl logo
UTL Home | Ethiopia Images | Central and Inner Asia Studies

Charter Document - 02184292

Charter Number: 02184292
Cartulary Title: Recueil des Chartes de l'Abbaye de Cluny
Charter Language: Latin
Charter Origin: Papal
Charter Type(s): Mandate
Date: 1184
Date Type: Internal, A.D., Calendar, Papal
Resource Link(s): CCE: cartae cluniacenses electronicae
map View Map
Charter:
Lucius Episcopus servus servorum Dei dilectis filiis Humberto Priori Monasterii sancti Arnulphi martyris Crespeii aliisque fratribus tam presentibus quam futuris regularem vitam professis in perpetuam memoriam Effectum justa postulantibus indulgere et vigor equitatis et ordo exigit rationis presertim quando petentium voluntatem et pietas adjuvat et veritas non relinquit Ea propter dilecti in Domino filii vestris postulationibus clementer annuimus et predecessorum nostrorum sancte recordationis Joannis Paschalis Innocentii Eugenii et Alexandri Romanorum Pontificum vestigiis inherentes prefatum sancti Arnulphi martyris Monasterium Crespeii in quo divino mancipati estis obsequio quod etiam nullius ditioni vel potestati nisi Romani Pontificis et Abbatis Cluniacensis subjectum esse dignoscitur sub beati Petri et nostra protectione suscipimus et presentis scripti privilegio communimus Imprimis siquidem statuentes ut omnia que a fundatoribus loci vestri a Gualterio videlicet Ambianensi quondam Comite et conjuge ejus Adela vestro Monasterio concessa et tradita esse noscuntur ad exemplar eorumdem predecessorum nostrorum vobis vestrisque successoribus in ea qua sunt tradita libertate conservari sancimus Preterea quascumque possessiones quecumque bona idem Monasterium impresentiarum juste et canonice possidet aut in futurum concessione Pontificum largitione Regum aut Principum oblatione fidelium sive aliis justis modis prestante Domino poterit adipisci firma vobis vestrisque successoribus et illibata permaneant tam a vobis quam ab aliis qui per Cluniacenses Abbates Priores prepositi fuerint perpetuo possidenda disponenda ac regenda in quibus hec propriis duximus exprimenda vocabulis Locum ipsum in quo prefatum Monasterium situm est cum terris vineis decimis et aliis omnibus pertinentiis suis marcatum scilicet et suburbium castri Crespeii cum cultura que eidem castro adjacet in qua pars castri fundata est altare et villam Ogeri cum decimis et omnibus eidem loco pertinentibus molendinum unum sub declivio montis castri Crespei positum in villa de Dilveiro unum super Alturnam aquam pratum unum et vineas Chasiam villam in Othivensi pago sitam cum omnibus pertinentiis suis terris sylvis pratis molendinis duabusque Ecclesiis matricem videlicet Ecclesiam ejusdem ville que est fundata in honorem sancti Dionysii martyris et subjacentem Capellam sancti Gengulphi cum decimis suis Ecclesiam sancti Martini sitam penes castellum pontis Arensis cum terris vineis et aliis pertinentiis suis que quidem juxta tenorem privilegiorum vestrorum tam vobis quam vestris subjaceat successoribus vestroque favore consilioque ordinetur In sylva Biera villam que dicitur Fagil cum omnibus pertinentiis suis in Meldensi pago Ecclesiam unam in villa que dicitur Mallos cum terris hominibus et decimis In Episcopatu Silvanectensi Ecclesiam sancte Agathe toto jure Parochiali totius castri Crespeii et omnibus pertinentiis suis altare de Frencto in Episcopatu Belvacensi altare et villamde Locellis cum omnibus pertinentiis suis cellam de Franceriis cum omnibus pertinentiis suis teneuram de Noitello domos videlicet et vineas et decimas de Harcheri In Episcopatu Ambianensi cellam que vocatur Morandi Monasterium cum grangia de avenis et omnibus suis pertinentiis quam quidem in eadem libertate semper manere sancimus in qua hactenus mansisse dignoscitur Possessiones de villa Vilet prope montem desiderii altare Villaris altaria de Germiniaco que per Falconis quondam Ambianensis Episcopi chirographum possidetis cum omni jure Parochiali ejusdem ville et decimis In Episcopatu Suessionensi Ecclesiam de Bunoculo cum grangia terris vineis pratis ac decimis aliisque reditibus Allodium Guidonis militis apud Meromontem allodium Leotaldi apud Dilucium cum aliis que ibi habetis villam Vallis villam Novam villam Galcherii militis et allodium de Frovesta Adjicientes quoque Apostolice Sedis auctoritate sancimus ut quemadmodum sancte recordationis predecessore nostro Joanne Papa statutum atque firmatum est quando idem locus sibi a jam dicto bone memorie Gualterio Ambianensi Comite in sue fundationis exordio oblatus est atque ab eo tamquam novella plantatio in propriam et specialem sancte Sedis Apostolice filiam eadem domus est adoptata ut nulli umquam Archiepiscoporum vel Episcoporum liceat excommunicationis seu interdicti sententiam absque assensu et mandato Romani Pontificis vel Legati ejus a latere distincti in idem Cenobium promulgare seu consuetudines aliquas ibi exigere vel Missas publicas contra voluntatem vestram celebrare aut alicujus gravaminis causa manum apponere Neque enim dignum est ut qui ad jus sacre Romane Ecclesie que omnium Ecclesiarum caput et mater est pertinere noscuntur quorumlibet oppressionibus graventur vel incursionibus agitentur Liceat quoque vobis in Ecclesiis vestris Presbyteros eligere et Diecesano Episcopo presentare quibus si idonei inventi fuerint Episcopus animarum curam committat ita quidem quod ei de spiritualibus vobis de temporalibus sine aliqua contradictione respondeant Sane si Presbyterum aliquem ad divina officia celebranda in quo divino mancipati estis obsequio duxeritis retinendum de altari Crucis quod ad vos pertinet nulli interim teneatur respondere Decimas quoque Novalium vestrarum que propriis manibus aut sumptibus colitis sive de nutrimentis vestrorum animalium nullus a vobis presumat exigere sed sine omni contradictione Episcoporum et Episcopalium Ministrorum eas deinceps quiete possideatis qui vestra peregrinis et pauperibus erogatis Neque cuilibet facultas sit vos pro vivorum seu defunctorum eleemosynis ob salutem animarum vobis canonice datis inquietare Sed tam vivorum quam defunctorum in dona et oblationes que ad vos deferentur in usus servorum Dei et pauperum profuturas salva justitia matricis Ecclesie vobis retinere liceat et habere Porro idem Monasterium cum omnibus pertinentiis suis sicut hactenus ex concessione sancte Sedis Apostolice fuisse dignoscitur sub Cluniacensis Monasterii libera ordinatione et dispositione consistat Decernimus ergo ut nulli omnino hominum fas sit prefatum Monasterium temere perturbare aut ejus possessiones auferre aut ablatas retinere minuereve seu quibuslibet exactionibus fatigare sed omnia integra conserventur eorum pro quorum gubernatione et sustentatione concessa sunt usibus omnibus profutura salva in omnibus Sedis Apostolice dignitate et in supradictis Ecclesiis Diecesanorum Episcoporum canonica justitia Si qua igitur in futurum Ecclesiastica secularisve persona hanc nostre constitutionis paginam sciens contra eam temere venire tentaverit secundo tertiove commonita nisi reatum suum digna satisfactione correxerit potestatis honorisque sui dignitate careat reamque se divino judicio existere de perpetrata iniquitate cognoscat et a sacratissimo Corpore et Sanguine Dei et Domini Redemptoris nostri Jesu Christi aliena fiat atque in extremo examine divine ultioni subjaceat Cunctis autem eidem loco sua jura servantibus sit pax Domini nostri Jesu Christi quatenus et hic fructum bone actionis percipiant et apud districtum Judicem premia eterne pacis inveniant Amen Amen Ego Lucius Catholice Ecclesie Ego Thedius Portuensis et sancte Rufine Episcopus Ego Lerius Albani Episcopus Ego Joannes Presbyter Cardinalis tituli sancti Marci Ego Petrus Presbyter Cardinalis tituli sancte Susanne Ego Laborans Presbyter Cardinalis sancte Marie trans Tiberim tituli sancti Calixti Ego Paulus Presbyter Cardinalis tituli Basilice sanctorum Apostolorum Ego Jacobus Diac Card S Marie Ego Gratianus sanctorum Cosine et Damiani Diaconus Cardinalis Ego Laborans S Angeli Diac Cardinalis Ego Goffredus sancte Marie in via lata Diaconus Cardinalis Datum Verul per manum Alberti sancte Romane Ecclesie Presbyteri Cardinalis et Cancellarii XII Kalendas Maii indictione II Incarnationis Dominice anno millesimo centesimo octuagesimo quarto Pontificatus vero Domni Lucii Pape tertii anno tertio
institution Institution - an Institution associated with either the giver or receiver of a property transaction in a charter
property Property - a property place location that is a transaction in a charter
issued Issued - the issued at place location for the charter
charter Charter