Charter Document - 02194533

Honorius Episcopus servus servorum Dei dilectis filiis Abbati et Priori sancti Benigni et Decano Capelle Ducis Divionensis Lingonensis Diocesis salutem et Apostolicam benedictionem Gravem nobis dilecti filii Abbas et Conventus Cluniacensis obtulere querelam quod Nivernensis Diecesanus electus Priorem sancti Stephani Cluniacensis ordinis de facto cum de jure nequiverit excommunicatum fecit publice nunciari ac Ecclesiarum suarum homines supposuit sententie interdicti contra privilegia eis ab Apostolica sede concessa temere veniendo nec iis contentus omnes etiam illos excommunicare presumpsit qui in furnis eorum coquerent vel in eorum molerent molendinis propter quod damna gravia se asserunt incurrisse Nolentes igitur indignum Ecclesie Cluniacensi gravamen sub dissimulatione transire discretioni vestre per Apostolica rescripta mandamus quatenus sententias quas in dictum Priorem et ejus homines contra privilegia Pontificum Romanorum ab ipso Electo vel alio vice ipsius latas esse constiterit penitus irritas nunciantes authoritate nostra moneatis eumdem electum ut sententiam quam tulit in eos qui in furnis coquerent vel in molendinis molerent eorumdem sine difficultate relaxans nec similes de cetero promulgare presumens dicto Priori congrue satisfaciat de damnis que occasione hujus sententie et excommunicationis incurrit Quod si facere non curaverit infra terminum quem sibi duxeritis prefigendum vos eamdem sententiam authoritate nostra juxta formam Ecclesie relaxantes audiatis que partes super damnis predictis aut aliis duxerint proponenda et quod justum fuerit appellatione postposita decernatis Facientes quod decreveritis per censuram Ecclesiasticam firmiter observari testes autem qui fuerint nominati si ex gratia odio vel timore subtraxerint per censuram eamdem appellatione postposita cogatis veritati testimonium perhibere Quod si non omnes iis exequendis potueritis interesse duo vestrum ea nihilominus exequantur Datum Laterani XI Idus Januarii Pontificatus nostri Anno sexto