Charter Document - 02194938

Viris venerabilibus et dominis karissimis A priori super omnes priores Cluniacensis cenobii et universo ejusdem ecclesie capitulo et universis fratribus ejusdem ordinis frater S humilis prior de Abbatis Villa de Wasto de Rumiliaco de Bogessem salutem et debitam obedientiam Fratre siquidem nostro Willermo priore Sancti Martini de Campis et camerario [vestro] in partibus nostris admodum karissimo intimante accepimus vestrarum discretionum auribus mendaciter instillatum fuisse nos Andrensis ecclesie curam et regimen suscepisse Ne igitur tantorum virorum tam discretorum in ambiguo diutius pendeant animi rei seriem immo veritatem vestre universitati dignum duximus explicare Andrensis etenim cenobii totum capitulum immo major et sanior pars capituli in presentia domini Morinensis qui nuperrime obdormivit in Domino nostri presentia ibidem casualiter oblata nos in rectorem licet minus dignum nescio quo intuitu cooperante [Deus scit] unanimiter elegerunt Dominus autem Morinensis huic electioni non nostris meritis sed sui gratia eximio affectu favorem adhibuit Cum autem Karrofensis ecclesie quidam monachi presentes afforent non palam sed clanculo electioni detrahentes ex nostre mentis industria quamvis modica electionem nec approbando nec improbando intulimus quod orbate ecclesie ex intimo mentis affectu quantum liceret subvenire non differremus si necessitas incumberet sed curam pastoralem et rerum administrationem alias suscipere quod potius usurpare esset non presumpsimus Presertim dominus comes de Ghines utputa ecclesie patronus tum precibus tum blanditiis et allicit et allexit Nos autem e regione nec precibus allecti nec honoris ambitione seducti in prejudicium Karrofensis ecclesie tale quid aggredi non decrevimus Absit enim ut aliunde quam per ostium ad caulam ovium Christi accedamus velut fures Sed nec ad instar paralytici per tegulas ut quidam mendaces asserunt descendere anhelamus Ponatur enim quod a Karrofensium subjectione Andrensis ecclesia omnino emancipata fuerit nihilominus absque vestri et venerabilium virorum consilio et universorum fratrum deliberatione alterius gregis caulam etsi infinitis afflueret reditibus refugere tam proponimus quam disponimus Cum enim ecclesia Cluniacensis nos ab utero matris educaverit a lacte usque ad solidum cibum velut mater altera ablactati jam nunc et adulti quandiu ei gratum fuerit nostre parvitatis obsequium ejus ab obsequio non cessabimus sed exemplo ciconie vici vicem reddere prout ei sederit satagemus Nostri etiam cordis fervor nunquam tepescens vobis et Cluniacensibus dominis venerabilibus viris et nobilibus nos adeo colligavit quod in majori negotio nedum in hoc vestris voluntatibus adversari nec vellemus nec possemus etiamsi tremendi judicis iram apud quem nihil inultum manebit in tanta transgressione non formidaremus Vestre autem universitati litteris apertis et non clausis scripsimus ut si in aliquo vel in aliquibus prelibatorum mendaces extiterimus in posterum harum attestatione litterarum nos velut alterum Uriam condemnare valeatis Valete et iterum dicimus valete