Charter Document - 02220005

Nous officiaus de la court de Besançon faisons savoir à touz ceuz qui verront et orront cez presentes lettres que comme Jehanz de Chalon sires d'Arlay eust ajorné par devant luy à Besençon Villeminet seigneur d'Abbanz son homme à jour dou mardi après la nativité saint Jehan Baptiste pour ce que lidiz Villeminez li deveut le remenant de son fié ce que conneut ne li en avoit que il tient doudit Jehan lidiz Villeminez estaubliz pour ce especialmant venant en droit ledit jour en la presence doudit Jehan et en la nostre qui estiens illuc appellez pour oir et pour tesmoignier adit Jehan la conneue que lidiz Villeminez li en voudroit faire comme publiques personnes et juges ordenaires en l'euglise des Freres Prescheours de Besençon conuit lidiz Villeminez que il tient doudit Jehan Abenz lo chastel tout ligemant et la tour rendable Boissieres le leu de Abenz la vile ce qu'il a à Byens en fié et rerefié sauf le fié Crespillon Chastieau le Bos et quanque il a dois la riviere dou Dou envers Abbens en fié et rerefié en tenueres et demenueres et especialmant le fié mons Guillaume d'Abans son oncle de sa maison et de quanque il tient de luy Laquel conneue faite lidiz Jehans requist adit Villeminet se lidiz fiez doudit Crespillon seoit entre ladicte riviere de Dou et ledit chastel d'Abbans et lidiz Villeminet respondit que oy mais il ne coneut ne ne nia que lidiz fiez doudit Crespillon fust dou fié audit Jehan et toutevoie il le mist ou raport à noble baron à monsignour de Monfacon et de son atrait Et promist et outroia lidiz Villeminet par sa foy corporelmant donnée en nostre main tenir et garder ce que lidiz sires de Monfacon et ses atraiz raporteront par sa ploinne parole senz sairement par sa bouche ou par letre fust lidiz Villeminez presenz ou non le jour de la quinzene de la Magdalene prochenemant venant lequel jour lidiz Johans assigna adit Villeminet à Monmaour par devant luy por faire et acomplir lez choses dessusdites Et promist ausi lidiz Willeminez par sa foy corporelmant donnée en nostre main tenir doudit Jehan en fié ce que lidiz sires de Monfacon et ses atraiz raporteront adit jour ensi com lez autres choses dessusdictes Laquel conneue faicte lesdictes parties nous requistrent comme publique personne et juge ordenaire si com il est dessus dit que nos tesmoignons toutes lez choses dessusdictes et en faisons faire lettres seelées dou seel de la court de Besençon Et nos li devant diz officiaus à la requeste dezdiz Jehan et Villeminet sus lesdictes choses avons fait faire ces presentes lettres et y avons fait metre en tesmoignage de verité le seel de la court de Besençon Ce fut fait le jour dessusdit l'an Nostre Signor corrant par MCC et septante et huit