Charter Document - 02220160

Nous Andrieus sires de Marmoaus faisons savoir à touz ces qui verront et orront ces lettres que nous avons donné et quité et donons et quitons à noble dame Beatrix jaidiz fame bone memoire Hugon duc de Bourgoigne le fié de Trunçaux que Hugues de Trunçaux escuiers tenoit de nous qui estoit assis à Tronçaus et ou finaige [et] estoit de part le pere audit Hugon Et nous Andreus sires de Marmeaus en avons quittey ledit Hugon de Tronçaux et ses hoirs à toutjorsmais perdurablemant et avons mandé et mandons adit Hugon de Trunchaux que il an aille en l'omaige de ladite dame des fiez de l'Ile et que lidiz Hugues de Trunchaux et sui hoir le tiegnent de ladite dame et des hoirs signours de l'Ile à toutjours mais perdurablemant Et prometons par nostre soiremant et sus obligation de nous biens garantir les choses dessusdites à toutjorsmais perdurablemant et que nous ne venrons ne farons venir par nous ne par autrui encontre les choses dessusdites Et pour ce que ceste lettre soit plus ferme et plus estauble nous avons seelé ceste lettre de nostre seaul et avons proié et requis à religious homes et saiges frere Huede humile abbé de Moustier Saint Jeham et à mons Gauthier dien de c'est meisme leu que il metent lours seaux en ces presantes lettres ensamble le nostre Ceu fut fait et doné en l'an de grace mil CC sexante et quinze ou mois de marz