Charter Document - 02220308

Je Guillaumes prestes fil çay en arrier mons Perrin de Morpré faiz savoir à touz que je non mie deceuz ne contrainz ne par force ne par barat ne par paour mais de ma bone volunté por mes besoignes affaire profitablemant et pour mes debz paier ay vendu baillié quité et outroié permaignablemant à mon amé et très chier signour Jehan de Chalon signour d'Arlay et es suens mes homes dou val de Myges c'est à savoir Poncet de Morpré P son frere Hemonet des Boscherens le Blanc son frere Fauconet le fil Germaine P dit Chalour de Froidefontaine Winet son frere Junet le frere Jaquet dit Richier Emonet son frere P et Erber enfant Vuillermint de Froidefontaine Pillet le Brun de Mignotviler P son frere Girar et Michiel enfant Bernart Fauconet et Rouz enfanz Arduy Germain de Planoisse et son frere et touz mes autres homes ensamble lour meys que je ay puis et doy avoir ou val de Myges lesquiex homes ensamble lour meys je tiens de fié ligement dou devantdiz Jehan mon signour Et cestes choses je ay vendu pour cenz livres d'estevenanz lesquiex j'ay eues et receues doudit mons Jehan en bons deniers nombrez Desquies choses vendues je me devist et en envist ledit mons Jehan et les suens et met en possession corporel prometanz En tesmoint de laquel chose je li devantdiz Guillaumes prestres ay requis et fait mettre en cex presentes lettres le seal dou chapitre de Saint Anathoille de Salins Ce fut fait et doné en l'an de grace Nostre Seignour corrant par mil CC quatre vinz et nuef le londi pruchain après la Chandelouse ou mois de fevrier