Charter Document - 02220359

Je Hugues diz de Pont chevaliers de Salins fais savoir à touz que j'ay vendu doné et quitté à noble baron Jehan conte de Burgoingne et signour de Salins et à ses hoirs qui saront signours de Monmaour trois maignies d'omes que j'avoie à Levier et lour meys c'est à savoir Perrins Guillemin enfanz Estene à fiz Richon et lour mès Morel Champion et son mès et le Ros son frere et son mès tel droit come je y avoie et quanque je avoie à Levier et ou finaige de Livier à Deserviler Jocerant frere Nicolier et son mès et quanque en ladite vile et ou finaige avoie por quarante livres d'estevenens lesquex ou temps de ladite vendicion ai receues en deniers nombrez tornez en mon profit desques deniers je me tien plainnement por paiez en pecune nombrée abrenunçant Et en tesmoignaige et en confirmation de ceste chose à ma priere et à ma requeste li chapitre de Saint Anathoile et de Saint Michiel de Salins ont mis lour seaux pendant en ces lettres Ce fut fait le sambadi après l'uictive de feste saint Michiel l'an de l'incarnation Jesus Crist qui corroit par mil dous cenz sexante et on