Charter Document - 02220575

Je Renauz abbes de Goile et je Gocin arcidiacre de Salins et je Enguerrant chevaliers et je Colins chevaliers et je Girars chevaliers et je Esteines Petit Cosins chevaliers et je Guillaumes de Saint Jehans chevaliers et je Guillaume de Layer chevaliers et je Hugonet Plante Vigne et je Hugonet Li Fevres borgois que sumes tuit de Salins faisons savoir à touz ces qui verront et orront cex lettres que entre nous d'une part et Jehan conte de Bourgoigne et sire de Salins d'autre part avons fait tel acort des muyres que nous avons ou pois de la salnerie de Salins par nostre soirement et celui li conte que li cuens est tenuz de rendre en bonne foiz il et li suens à touzjours mais à nous et à noz hoir ou à nostre comandement chescune semaine de l'an que chaudieres boudront à fuer dou trait de vingt et doux boillons la semaine selon ce que il aferra à quartier En tel maniere avons nous acordé des mures que sont de nostres heretaiges et des muyres que nous avons conquises jusques au jour d'uy et de celes muires que nous avons de gagieres nous avons mis en sa marci de metre le fuer Et doit l'on savoir que des muires que l'on traira per les cuves après Noel et que l'on traira per les cuves ausi après Pasques et la semaine après Penthecoste ou en autres semaines feriés de Noel en Noel nous [et] li nostres devons prendre nostre partie selonc ce que nous avons de muyre Et avons encores ensic acordé que li celors que seront en son poiz de Salins seront droitement et loialment à nostre veuz et es noz à touzjours mais à la droite mesure des dix et sept quartiers et deme dou carteron loial qui corroit à tens Gauchier seignour de Salins Et s'il avenoit ansi que li devantdiz cuens fust en guerre par quoy il ne peust buillir son droit de la muire qu'il auroit en son poiz il nous outroie que se nous poons buillir ce que nous en aferra de chescune semaine que nous buillon sou façons de nostre droit nostre volonté Et par cest acort nous avons doné et quitté permaignablement à devantdit Jehan conte de Bougoigne et signour de Salins et ses hoirs tout le droit que nous devens avoir en la muire que li devantdiz pois de Salins geteroit chescune semaine outre le trait de vingt et doux buillons Et pour ce que ce soit ferme chose et estauble li chapistres de Saint Anathoile et li chapistres de Saint Michiel de Salins à noz prieres et à celes le conte ont mis lour seaux en ces lettres en tesmoignaige de verté Ce fut fait l'endemain de l'anunciacion Nostre Dame en l'an que l'Incarnacion corroit par mil et doux cenz et quarante ou mois de marz