Charter Document - 02360635

Sachent tout cil qui ces presentes letres verront et orront que nos Joffroy de Sargines chevaliers avons receu de mon seignor Loeys par la grace de Dieu roi de France quatre paires de letres sayelées de son seyeau de cire pendant dont il conteneit en l'une de cez letres l'enprunt de treiz cenz libres de torneiz et en la seconde l'enprunt de quatre cenz lb et en la tierce l'enprunt de sis cenz lb et en la quarte l'enprunt de set cenz lb de qnoi nos avons receus sur celes letres l'enprunt de deus mille lb de torneiz ce est assayeir de Bencheveigne Johan et de Bonfiz Contedin marchaanz de Sene de la compaignie de Rolant de Bouseignor lesquels deus mille lb de torneiz nos vindrent à moult grant besoing com ciaus qui nos esteient moult grant mestier lesquels nos avons departi à noz genz Et encore mon seignor le patriarche de Jérusalem et leguaz de l'apostolial siege et mesire Erart de Valery et mei avons receu de mou seignor le roy de France autres quatre paires de letres sayelées de son seyau de cire pendant dont il conteneit en l'une de cez letres l'enprunt de treiz cens lb de torneiz et en la seconde l'enprunt de ssis cenz lb et en la tierce l'enprunt de set cenz lb et en la quarte l'enprunt de huit cenz lb de torneiz que les devant diz monseignor le patriarche et mesire Erart de Valery et mei avons receuz por les chevaliers pélerins retenir en la Terre Sainte lesquels deuz mille et quatre cenz lb de torneiz nos avons receus des devant diz marchaanz por faire et acomplir le comandement de mon seignor le roy de France Por quoi nos prions et souplions la soe seignorie que il a Hugue Jaque ou à Rostor Jointe ou a Jaque Gille ou à aucun autre de la dite compaignie qui li presentera les letres devant dites ou le transcriz d'eles qui soient sayelées dou seyau de mon seignor le patriarche et des maistres dou Temple et de l'Ospital et de mesire Erart de Valery et de mei veuille faire délivrer mon seignor le roy de France la devant dite quantité ce est assaveir les quatre mille et quatre cenz lb de torneiz devant dites Et en guarantie de ce nos avons sayélées cez présenz letres de notre seyau de cire pendant Ce fu fait à Acre en l'an de l'Incarnation Nostre Seignor Jhesu Crist M et CC et LXVII le derein jor dou mois de juing