Charter Document - 02450084

Hec constitutio de reddendis firmis canonicorum tam de terris quam de ecclesiis facta est in capitulo Exoniensis ecclesie auctoritate venerabilis B eiusdem ecclesie episcopi et assensu capituli tunc presentis Quicunque firmarius fuerit solvet plenarie et integre procuratori predicti capituli qui pro tempore erit quartam partem firme sue proxima die post festum beatorum apostolorum Petri et Pauli et aliam quartam plenarie reddet proxima die post festum beati Michelis et iterum aliam quartam in festo beati Thome apostoli ultimam vero quartam solvet tertia feria post dominicam ramis palmarum Si qui predictos terminos in solutione facienda non servaverit quartam partem modii id est ix sextarios sativi nomine pene componet Ita ut elapso die solutioni constituto statim sit pena commissa Si vero ultra unam septimanam in solvendo moram fecerit alios ix sextarios nomine pene persolvet mora quoque cuiusque septimane sequentis equali pena vindicabitur Episcopus vero aut communionis aut capituli et chori privatione aut officii suspensione aut ipsius firme subtractione in pene contemptores usque ad ipsius plenariam solutionem animadversurum se constituit Ad hanc constitutionem conservandam magister Ricardus filius Ranfridi et Philippus de Furn[ellis] qui tunc duas firmas susceperunt interposita fide quoad ipsos se obligaverunt Et quicumque decetero aliquam firmam susceperit in idipsum fidem interponet aut iuratoriam cautionem exponet Et ut hoc statutum inviolabile perseveres duorum sigillorum episcopi videlicet et capituli inpressione coroboratum est Facta est autem hec constitutio anno incarnationis domini MCLXI