Charter Document - 02520214

In nomine domini amen Si terrena negocia que ad corporis transitorias spectant commoditates litteris et cautela testium roborantur multo dignius ea que in remedium animarum que eterne sunt perficiuntur robustius debent cautionibus confirmari Quapropter ego Alrammus de Vtendorf notum facio universis Christi fidelibus tenorem presencium inspecturis quod divina inspirante gratia elegi michi sepulturam in cenobio beate virginis Marie in Raitenhasla ordinans cum fratribus eiusdem loci ut si forte quod absit post mortem meam aliquo excommunicationis vinculo sum astrictus homines mei secundum consilium ipsorum fratrum in propriis meis expensis laborabunt ut absolutionis michi benencio succurratur et sic in ipso loco quem pro requie michi elegi tradar ab eisdem fratribus quorum fraternitatem obtinui adhuc vivens ecclesiastice sepulture Preterea curiam meam Pischolfsdorf dictam propria manu contuli predicto cenobio delegans eam super altare ipsius videlicet gloriose virginis Marie in remissionem peccatorum meorum ac progenitorum et successorum meorum hac tamen interposita condicione quod si absque heredibus decessero ipsa curia cum usu fructuario cedet ipsi cenobio libere et absolute iure perpetuo possidenda Si vero successum habuero liberorum qui prefatam voluerint curiam possidere ipsam XXX libris Salzburgensis monete a memorato cenobio redimant vel aliud eis predium equipollens loco huius antea restituant et ex tunc curiam prenominatam Pischolfsdorf videlicet sibi vendicent libere et absolute et quamdiu hoc non fecerint fratres predicti cenobii proventus annuos iamdicte curie libere recipient nichil de eisdem proventibus propter diuturnitatem possessionis in prelibata summa meis heredibus relaxantes In huius rei testimonium evidens et cautelam presens scriptum tradidi cenobio supradicto sigilli mei karactere necnon et nomine ac testimonio subscriptorum videlicet dominus Wernhardus capellanus ducis Bawarie plebanus de Mawerchirhin item Chunradus notarius prefati principis scilicet plebanus de Piburch item Wernhardus prior de Raitenhaslach et Dittricus camerarius et Heinricus cellerarius maior eiusdem loci item plebanus de Pischolfsdorf dictus Sigenhaimer Vricus Vitulus et Herbordus servus Vtendorfari Fridericus Hallarius et alii quam plures