Charter Document - 03180241

G[ilebertus] Dei gratia Lundoniensis episcopus omnibus sancte matris ecclesie filiis ad quos presentes litere pervenerint salutem in Domino Ad universitatis vestre volumus devenire notitiam causam que inter venerabilem abbatem W[alterum] et conventum Westm[onasterii] et magistrum Alexandrum vicearchidiaconum Lincoln[iensis] ecclesie canonicum et Henricum et Haketum clericos super ecclesiis de Dodinton et de Torp vertebatur quam a domno papa nobis commissam iudicio vel concordia terminandam susceperamus partibus coram nobis assistentibus post multas ipsarum allegationes hoc tandem fine conquievisse Predicti siquidem magister Alexander et Henricus et Haketus ecclesias de Dodinton et de Torp in manus nostras refutaverunt et iuri si quid in eis habuerant spontanea voluntate renuntiaverunt Nos igitur ad petitionem memorati abbatis et conventus Westm[onasterii] magistro Nicholao clerico suo supradictas ecclesias de Dod[inton] et Torp cum omnibus ad eas pertinentibus concessimus ipsumque in eisdem ecclesiis auctoritate apostolica ea qua debuimus sollempnitate personam instituimus Nicholaus vero assensu et auctoritate memorati abbatis et conventus earundem ecclesiarum medietatem supradicto Alexandro et Roberto Code et alteram ipsarum ecclesiarum medietatem Haketo clerico toto vite sue tempore de se tenendam concessit ita saltem quod magister A[lexander] et R[obertus] Code supramemorato Nicholao annuos quinquaginta solidos et Haketus similiter quinquaginta solidos annuatim ei nomine ecclesiarum ad statutos inter eos terminos persolvent Et si prescripti A[lexander] et R[obertus] quoquomodo ab ipsis ecclesiis prius quam Haketus recesserint eorum pars Haketo cedet et si Haketus ab eis quoquomodo recesserit ipsius pars memoratis A[lexandro] et R[oberto] cedet salva sepedicto N[icholao] integra centum solidorum pensione et si eundem Nicholaum in fata decedere vel vitam mutare vel alio modo ab eisdem recedere contigerit suprascripti A[lexander] et R[obertus] et H[aketus] prenominatam centum solidorum pensionem ecclesie et conventui Westm[onasterii] vel ei quem abbas et conuentus ad eam percipiendam assignauerint integre persoluent Hanc autem pensionem magistro N[icholao] quoad vixerit et ecclesie Westm[onasterii] vel ei quem abbas post Nicholai decessum assignaverit se fideliter soluturos et conventionem inter eos factam firmiter observaturos sepenominati A[lexander] et R[obertus] et Haketus sacramento corporaliter prestito in nostra et multorum presentia repromiserunt Nos itaque que taliter acta sunt ne denuo super eis lites suscitentur et iurgia ut posteritati liqueant in scriptum redegimus et ut de cetero firmitatis robur optineant pagine presentis inscriptione et sigilli nostri appositione apostolica qua in causa hac functi sumus auctoritate communivimus Valete