Charter Document - 03380062

+ In nomine patris et filii et spiritus sancti amen Nos Petrus dei miseratione Hereforden [] episcopus a domino papa iudex delegatus una cum venerabili patre archiepiscopo Eboracensi super negotio matrimonii quod de facto intervenisse quondam dicitur inter dominum Henricum illustrem [] regem Anglie et dominam Iohannam filiam quondam [] comitis Pont nunc illustrem [] reginam Castelle et super consensu qui per interpositas personas iuramento prestito intervenisse dicitur inter ipsos et super quarto gradu consanguinitatis in quo ut asseritur se attingunt prout hec et alia in mandato apostolico pleniter continentur Recepto predicto mandato partibus citatis ad octabas beati Gregorii anno domini MCC quinquagesimo primo in ecclesia Sancti Stephani Senonensi collega nostro litteratorie excusato predicta [] regina per se vel per aliquem procuratorem minime comparente magister Iohannes Capelli procurator dicti domini regis Anglie cum litteris eiusdem regis de mandato ad diem et locum assignatum comparuit coram nobis Nobis igitur die et loco assignatis pro tribunali sedentibus et adiunctis assessoribus venerabili patre domino G dei gratia Autissiodorensi [] episcopo et viris venerabilibus Iohanne subcantore et Iohanne [] canonico et officiali Autissiodorensi libellum nobis traditum a dicto procuratore domini regis recepimus in hunc modum Anno domini MCC quinquagesimo primo in octabis beati Gregorii coram vobis venerande pater [] P dei gratia Herefordensi [] episcopo iudice a domino papa delegato proponit et asserit Magister Iohannes Capelli procurator domini Henrici dei gratia illustrissimi [] regis Anglie quod cum ipse [] rex olim iurasset quod Iohannam tunc filiam comitis Pontin nunc illustrem [] reginam Castelle duceret in uxorem postmodum in dictam dominam Iohannam tunc solutam dictus [] rex consensit matrimonialiter de facto per interpositas personas non tamen presentialiter se viderunt nec amplius processum extitit inter ipsos tandem comperiens dictus rex quod ipse et dicta domina Iohanna se attingebant in quarto gradu consanguinitatis quare non erat nec esse poterat matrimonium inter ipsos matrimonio huiusmodi minime consummato mutato consilio in melius contraxit matrimonium in facie ecclesie cum domina Helyenora filia tunc [] comitis Provincie quam modo habet per dei gratiam in uxorem Dicta vero Iohanna contraxit matrimonium cum [] rege [] Castelle Unde ad removendam omnem notam infamie ne sit quod dicto [] regi vel suis valeat obici vel temere imputari petit dictus procurator nomine dicti regis Anglie a vobis domine iudex quod recipiatis testes ad probandam supradictam consanguinitatem in quarto gradu quam offert se probaturum procuratorio nomine [] precipue cum predicta [] regina [] Castelle citata peremptorie per religiosum virum [] priorem Altecombe Cisterciensis ordinis ad octabas beati Gregorii in ecclesia Sancti Stephani Senonensi pro predicta causa responderet quod numquam comparebit et re vera non comparet per se vel per procuratorem aliquem unde cum contumax appareat ut pote citatione peremptorie recepta venire contempnens petit instanter dictus Magister Iohannes procurator dicti domini regis Anglie ut testes predictos recipiatis et ipsis receptis et eorum attestationibus inspectis ad diffinitivam sententiam nichilominus procedatis auctoritate apostolica secundum canonicas sanctiones Petit etiam dictus procurator quod pronuncietis quarto gradu consanguinitatis impediente inter predictum regem Anglie et prelibatam [] reginam Castelle quondam filiam [] comitis Pontin nullum matrimonium extitisse et non obstante consensu vel iuramento que de facto dicuntur intervenisse legitimum esse matrimonium contractum inter predictum regem et dominam Helienoram filiam quondam [] comitis Provincie et nunc [] reginam Anglie et hoc petit dictus procurator quod hec auctoritate apostolica faciatis salvo iure addendi minuendi [] attendentes igitur predicte [] regine [] Castelle contumaciam testes nobis presentatos a dicto procuratore domini [] regis Anglie recepimus de consilio predictorum assessorum et plurium aliorum et examinavimus diligenter attestationibus ipsorum testium in scriptis redactis fideliter et postmodum sollempniter publicatis predicto procuratori domini [] regis petenti cum instancia proferri sententiam diem Mercurii ante Ramos Palmarum duximus assignandam ad diffinitivam sententiam proferendam Dicta vero die Mercurii comparente dicto procuratore coram nobis et assessoribus supradictis in ecclesia Sancti Stephani Senonensi et a nobis petente proferri sententiam nos attendentes dictam [] reginam [] Castelle existere contumacem in hoc negocio eius contumacia pro presentia reputata collega nostro per litteras excusato habito diligenti tractatu cum assessoribus nostris et aliis iurisperitis de ipsorum consilio demum habentes pre oculis auctoritate apostolica sententiando pronuntiavimus predictum dominum Henricum [] regem Anglie et memoratam dominam nunc [] reginam Castelle sese attingere in quarto gradu consanguinitatis et quarto gradu consanguinitatis impediente nullum extitisse matrimonium inter ipsos eadem auctoritate etiam pronuntiavimus quod non obstante sacramento quod dictus rex fecisse dicitur de contrahendo cum dicta domina Iohanna nunc regina Castelle nec obstante quod consensit per interpositas personas de facto matrimonialiter in eadem matrimonium preterea contractum inter predictum [] regem Anglie et dominam Helienoram [] reginam Anglie natam quondam [] comitis Provincie esse legitimum et contractum secundum canonicas sanctiones In cuius rei testimonium tam nos quam predicti assessores sigillis nostris presentem sententiam sigillamus Nos autem predictus [] episcopus Autissiodorensis Iohannes subcantor et Iohannes canonicus et officialis Autissiodorensis assessores predicti domini episcopi Hereforden presenti sententie sigilla nostra duximus apponenda Testes G [] archidiaconus Lugdunensis Nicholaus de Albacia canonicus Autissiodorensis Magister Droco canonicus Autissiodorensis et dominus Lambertus capellanus predicti domini [] episcopi Autissiodorensis Actum in ecclesia beati Stephani Senonensi die Mercurii ante Ramos Palmarum anno domini MCC quinquagesimo primo