Charter Document - 03391039

Noverint universi presens scriptum inspecturi quod cum quedam controversia mota esset inter magistrum Henricum Tesson rectorem ecclesie de Nywton ex una parte et abbatem et conventum Glaston ex altera super omnibus decimis maioribus et minoribus dominici dictorum monachorum in dicto manerio de Nywton coram priore Sancte Fredeswyd Oxon et collegis suis iudicibus a domino papa delegatis tandem dicta controversia inter dictas partes amicabiliter sic conquievit Videlicet quod omnes dicte decime sive bladi sive feni sive ortorum sive molendinorum sive piscariorum sive leguminum sive nutrimentorum animalium et eorum exitus sive quarumcumque rerum aliarum decimalium remaneant inperpetuum dicto rectori et successoribus suis et ecclesie de Nywton ita tamen quod idem rector et successores sui dicte ecclesie de Nywton solvant singulis annis inperpetuum dictis abbati et successoribus suis et conventui et ecclesie Glaston iii marcas argenti pro bono pacis nomine dictarum decimarum ad ii terminos anni scilicet unam marcam et dimidiam infra quindenam proximam a festo sancti Michaelis et aliam marcam et dimidiam infra quindenam proximam a die Pasche sine omni difficultate dilatione et dolo Dictus autem magister Henricus fideliter procurabit et partes suas interponet quod dominus episcopus Sar et capitulum suum hanc compositionem confirment et sigillis suis corroborent quo magis fiat realis et inperpetuum indissolubiliter observetur Fiet autem prima solutio ad proximam quindenam proximi festi sancti Michaelis Ad maiorem vero securitatem et robur omnium premissorum utraque pars una cum supradictis iudicibus huic scripto in modum cirographi confecto sigilla posuit Hiis testibus magistro Willelmo decano magistro Ricardo cancellario magistro Willelmo subdecano Welln et magistro Rogero de Runfeger Rogero et Thoma de Mariscis clericis Rogero Waveyn et aliis Actum anno gratie MCCXXXVI in crastino sancti Andree apostoli apud Well