utl logo
UTL Home | Ethiopia Images | Central and Inner Asia Studies

Charter Document - 03400247

Charter Number: 03400247
Cartulary Title: Salisbury 1263-1297 Volume 37
Charter Language: Latin
Charter Origin: Religious
Charter Type(s): Notification
Date: 1269
Date Type: Internal, Feast, A.D., Episcopal

map View Map
Charter:
Omnibus Cristi fidelibus ad quos presens breve pervenerit Walterus miseratione divina Sar ecclesie minister humilis salutem in domino Noverit universitas vestra quod cum viri religiosi abbas et conventus Osen pretenderent se ex collationibus predecessorum nostrorum et confirmatione decani et capituli Sar plenum ius habere in ecclesia de Peseya nostre diocesis seque esse in possessione eiusdem officialibus nostris in contrarium asserentibus pro eo videlicet quod ius eorum si quod habebant postmod[um] extitit interruptum demum predicti abbas et conventus salvis sibi homagiis et servitiis Willelmi Fukeram et heredum suorum debitis pro duabus hydis terre quas de eisdem tenet in Peseya et in Bokelande per servitium militare pure sponte et absolute super omni iure et possessione ecclesie antedicte se nostre ordinationi submiserunt promittentes quod quicquid super iure vel possessione ecclesie antedicte duxerimus ordinandum acceptabunt et perpetuo observabunt Nos vero de consilio et consensu decani et capituli Sar ordinavimus in hunc modum In nomine patris et filii et spiritus sancti Amen Inspectis iuribus cartis et munimentis dictorum abbatis et conventus Osen super iure et possessione ecclesie antedicte quamquam ius eorum per temporis malitiam ad tempus fuerit interruptum ordinamus statuimus et diffinimus quod dicti religiosi in aumentum hospitalitatis et elemosine nomine simplicis beneficii singulis annis et in perpetuum libere et sine aliquo onere recipiant de bonis ecclesie antedicte per manus vicarii qui pro tempore fuerit quatuor marcas sterlingorum scilicet in crastino Animarum duas marcas annuas et in oct[abis] Pasche alias duas marcas annuas Totum vero residuum pertinens ad ecclesiam antedictam cedat ad usum portionem et sustentationem vicarii perpetui a nobis et successoribus sine alicuius presentatione in dicta vicaria instituendi qui in ordine sacerdotali ibidem personaliter residebit et omnia onera dictam ecclesiam contingentia portabit et sustinebit et predictas quatuor marcas singulis annis prefatis religiosis in terminis antedictis apud Osen persolvet Et in sui creatione iuramentum fidelitatis et quod fideliter dictam solvet prestationem religiosis antedictis in eorundem capitulo prestabit Et hoc idem iuramentum in capitulo domini archidiaconi Bark vel eius officialis recitabit et renovabit Si vero iurare vel iuramentum recitare modo predicto recusaverit vel in dicte peccunie solutione in aliquo dictorum terminorum cessaverit archidiacono Berk vel eius officiali qui pro tempore fuerit tenore presentium pro nobis et successoribus nostris statuendo iniungimus quod visis literis nostris ipsum per quamcumque censuram ecclesiasticam ad dicti iuramenti prestationem et ad prefate peccunie plenarie solutionem sine strepitu iudiciali compellat et tanquam inobedientem et periurum puniat non obstante exceptione repplicatione appellatione impetratione regia prohibitione nec aliquo alio remedio iuris canonici vel civilis quod sibi contra istam ordinationem proficere possit Ut autem omnia supradicta rata et stabilia in perpetuum perseverent huic scripto sigillum nostrum una cum sigillo capituli nostri Sar fecimus apponi Dat apud Sar in Natali domini anno domini MCCLX nono et pontificatus nostri anno septimo
institution Institution - an Institution associated with either the giver or receiver of a property transaction in a charter
property Property - a property place location that is a transaction in a charter
issued Issued - the issued at place location for the charter
charter Charter