utl logo
UTL Home | Ethiopia Images | Central and Inner Asia Studies

Charter Document - 03510037

Charter Number: 03510037
Cartulary Title: Charters of Rochester
Charter Language: English
Charter Origin: Religious
Charter Type(s): Account
Date: 0955 - 1006
Date Type: Assigned
Resource Link(s): Anglo Saxon Charters (S 1456) eSawyer (S 1456)
map View Map
Charter:
Px Her cyð on ðysum gewrite hu Godwine biscop on Hrofeceastre et Leofwine Ælfeages sunu wurðon gesybsumode ymbe þæt land æt Snoddinglande on Cantwarabyrig Þa ða se biscop Godwine com to ðam biscopstole þurh hæse his cynehlafordes Æðelredes cynges æfter Ælfstanes forðsiþe biscopes þa gemetæ he on ðam mynstre þa ylcan swutelunga þe his foregenga hæfde et þærmid on þæt land spæc ongan ða to specenne on ðæt land et elles for Godes ege ne dorste oððæt seo spræc wearð þam cynge cuð Þa ða him seo talu cuð wæs þa sende he gewrit et his insegl to þam arcebisceope Ælfrice et bead him þæt he et hys þegenas on East Cent et on West Cent hy onriht gesemdon be ontale et be oftale Þa þæt wæs þæt se bisceop Godwine com to Cantwarabyrig to ðam arcebiscope þa com ðider se scyresman Leofric et mid him Ælfun abbod et þegenas ægþer ge of[]a East Cent ge of West Cent eal seo duguð et hy ðær þa spæce swa lange handledon syððon se bisceop his swutelunge geeowod hæfde oþ hy ealle bædon þone biscop eaðmodlice þæt he geunnan scolde þæt he moste mid bletsunga þæs landes brucan æt Snoddinglande his dæg et se biscop þa þæs getiðode on ealra þæra witena þanc þe þær gesomnode wæran et he behet þæs truwan þæt land æfter his dæge unbesacen eode eft into þære stowe þe hit ut alæned wæs et ageaf þa swutelunga þe he to þam lande hæfde þe ær of þære stowe geutod wæs et þa hagan ealle þe he bewestan þære cyrcan hæfde into þære halgan stowe et þises loces ærendracan wæran Ælfun abbod et Wulfric abbod et Leofric sciresman et Siweard et Wulfstan æt Sealtwuda et Ælfelm Ordelmes sunu Þonne is her seo gewitnes þe æt þisum loce wæs þæt is ærest se arcebiscop Ælfric et se biscop Goduuine et Wulfric abbod et Ælfun abbod et Ælfnoð æt Orpedingtune et se hired æt Cristes cyrcan et se hired æt Sancte Augustine et so burhwaru on Cantwarebyrig et Leofric sciresman et Lifing æt Meallingun et Siweard et Sired his broðor et Leostan æt Mærseham et Godwine Wulfeages sunu et Wulstan æt Sealtwuda et Wulfstan iunga et Leoswine æt Dictune et Leofric Ealdredes sunu et Goda Wulfsiges sunu et Ælfelm Ordelmes sunu et Sidewine æt Pealleswyrðe et Wærelm et Æþelred portgerefa on byrig et Guðwold Gif hwa þis ðence to awendenne et þas foreword to abrecenne awende him God fram his ansyne on þam miclan dome swa þæt he si ascyred fram heofena rices myrhðe et sy eallum deoflum betæht into helle Amen
institution Institution - an Institution associated with either the giver or receiver of a property transaction in a charter
property Property - a property place location that is a transaction in a charter
issued Issued - the issued at place location for the charter
charter Charter