utl logo
UTL Home | Ethiopia Images | Central and Inner Asia Studies

Charter Document - 03580001

Charter Number: 03580001
Cartulary Title: Charters of the New Minster, Winchester
Charter Language: English
Charter Origin: Religious
Charter Type(s): Will
Date: 0872 - 0888
Date Type: Assigned
Resource Link(s): eSawyer (S 1507) Anglo Saxon Charters (S 1507) British Library - Add MS 82931 (8v) British Library - Stowe MS 944 (f29v)
map View Map
Charter:
Ic Ælfred cingc mid Godes gife et mid geþeahtunge Æþeredes ercebisceopes et ealra Westseaxena witena gewitnesse smeade ymbe minre sawle þearfe et ymbe min yrfe þæt me God et mine yldran forgeafon et ymbe þæt yrfe þæt Aðulf cingc min fæder us þrim gebroðrum becwæð Aþelbolde et Æðerede et me et swylc ure swylce lengest wære þæt se fenge to eallum Ac hit gelamp þæt Æþelbold gefor et wyt Æþered mid ealra Westseaxena witena gewitnesse uncerne dæl oðfæstan Æþelbyrhte cingce uncrum mæge on þa gerædene þe he hit eft gedyde unc swa gewylde swa hit þa wæs þa wit hit him oðfæstan et he þa swa dyde ge þæt yrfe ge þæt he mid uncre gemanan begeat et þæt he sylf gestrynde Þa hit swa gelamp þæt Æþered to feng þa bæd ic hine beforan urum witum eallum þæt wyt þæt yrfe gedældon et he me ageafe minne dæl Þa sæde he me þæt he naht eaðe ne mihte todælan forþon he hæfde ful oft ær ongefangen et he cwæð þæs þe he on uncrum gemanan gebruce et gestrynde æfter his dæge he nanum menn sel ne uðe þonne me et ic þæs þa wæs wel geþafa Ac hit gelamp þæt we ealle on hæðenum folce gebrocude wæron Þa spræce wyt ymbe uncre bearn þæt hy sumre are beþorftan sælde unc on þam brocum swa unc sælde Þa wæron we on gemote æt Swinbeorgum þa gecwædon wit on Westseaxena witena gewitnesse þæt swaðer uncer leng wære þæt he geuðe oðres bearnum þara landa þe wyt sylfe begeaton et þara landa þe unc Aðulf cingc forgeaf be Aðelbolde lifiendum butan þam þe he us þrim gebroðrum gecwæð et þæs uncer ægðer oþrum his wedd sealde swaðer uncer leng lifede þæt se fenge ægþer ge to lande ge to madmum et to eallum his æhtum butan þam dæle þe uncer gehwæðer his bearnum becwæð Ac hit gelamp þæt Æðered cingc gefor Þa ne cydde me nan mann nan yrfegewrit ne nane gewitnesse þæt hit ænig oðer wære butan swa wit on gewitnesse ær gecwædon Þa gehyrde we nu manegu yrfe geflitu nu þa lædde ic Aþulfes cinges yrfegewrit on ure gemot æt Langandene et hit man arædde beforan eallum Westseaxena witum Þa hit aræd wæs þa bæd ic hy ealle for minre lufan et him min wedd bead þæt ic hyra næfre nænne ne oncuðe forþon þe hy on riht spræcon et þæt hyra nan ne wandode ne for minan lufan ne for minum ege þæt hy þæt folcriht arehton þy læs ænig man cweðe þæt ic mine mægcild oððe yldran oððe gingran mid wo fordemde et hy þa ealle to rihte gerehton et cwædon þæt hy nan rihtre riht geþencan ne mihtan ne on þam yrfegewrite gehyran nu hit eall agan is þæron oð þine hand þonne þu hit becweðe et sylle swa gesibre handa swa fremdre swaðer þe leofre sy et hi ealle me þæs hyra wedd sealdon et hyra handsetene þæt be hyra life hit nænig mann næfre ne onwende on nane oðre wisan butan swa swa ic hit sylf gecweðe æt þam nyhstan dæge
institution Institution - an Institution associated with either the giver or receiver of a property transaction in a charter
property Property - a property place location that is a transaction in a charter
issued Issued - the issued at place location for the charter
charter Charter