utl logo
UTL Home | Ethiopia Images | Central and Inner Asia Studies

Charter Document - 03633560

Charter Number: 03633560
Cartulary Title: The Register of St. Augustines Abbey Canterbury
Charter Language: Latin
Charter Origin: Religious
Charter Type(s): Grant
Date: 1251
Date Type: Internal, A.D., Feast

map View Map
Charter:
Omnibus sancte matris ecclesie filiis presentem paginam visuris vel audituris Robertus Dei gracia abbas sancti Augustini Cantuarie et eiusdem loci conuentus humilis salutem in Domino sempiternam Nouerit vniuersitas vestra nos intuitu diuine pietatis magistrum Bartholomeum Cherac de Ferentino de consensu tocius capituli nostri in fratrem recipisse et omnium beneficiorum que in domo nostra fiunt et fient in perpetuum specialiter constituisse participem Nos eciam de pura et libera et mera voluntate nostra dicto magistro Bartholomeo Chrac de Ferentino cum de morte sua nobis fuerit bene manifestum quod viam vniuerse carnis fuerit ingressus pro seruicio suo nobis olim collato decem marcas sterlingorum pro anima dicti magistri Bartholomei et animabus omnium fidelium defunctorum distribuendas per manus elemosinarii nostri qui pro tempore fuerit de thesauraria nostra damus concedimus et hac presenti pagina in perpetuum confirmamus pro voluntate predicti magistri Bartholomei prout inferius apparebit absque omni contradictione cauillacione dolo fraude malo ingenio singulis annis in perpetuum Ad consummandum vero et perficiendum pium propositum dicti magistri Bartholomei sicut in futuris liquebit vna cum predictis decem marcis dictus magister Bartholomeus nobis tres marcas annui redditus assignauit quas ab Adam de Wischebeche et Willelmo fratre suo in parochia de Christelet comparauit sicut in carta super hiis confecta plenius continetur vna cum centum marcis argenti quas nobis spontanea et mera et libera voluntate sua nobis premanibus contulit et donauit Dicte vero tresdecim marce singulis annis in perpetuum a thesauraria nostra recipiantur et per manus elemosinarii nostri qui pro tempore fuerit distribuantur sub hac forma videlicet die anniuersarii sui decem solidi sterlingorum pauperibus debilibus hostiatim mendicantibus in cimiterio sancti Augustini pro anima eius et animabus omnium fidelium defunctorum omni anno in perpetuum in pane erogentur Item eodem die omni anno viginti quatuor solidi in perpetuum in vestimentis et calciamentis debilium et pauperum erogentur Item ad sustinendum vnum cereum de cera ponderis xl librarum futuris perpetuisque temporibus quem idem magister Bartholomeus in criptis monasterii sancti Augustini Cantuarie diuine caritatis intuitu ad honorem beate Virginis ardendum assignauit et illum annuatim in festo Annunciacionis beate Virginis innouandum detur vna marca argenti Et si in dicto cereo vna marca per annum expensa non fuerit residuum predicte marce ad augmentandum lumen beate Virginis expendatur Item die sui anniuersarii nobis scilicet abbati et conuentui pro pitancia vnam marcam omni anno perpetualiter concessit Item ordinauit et disposuit dictus magister Batholomeus quod quolibet anno idibus Iunii conuentus habeat quatuor solidos pro pitancia pro anima domini Iohannis Egicii et animabus omnium fidelium defunctorum Item idem conuentus habeat quatuor solidos pro anima domine Romane vxoris predicti Iohannis et animabus omnium fidelium defunctorum in vigilia beati Andree Item quatuor solidos tercia die ante festum Omnium Sanctorum pro pitancia pro anima domini Iohannis de Roma patris dicti magistri Bartholomei Cherac de Ferentino et animabus omnium fidelium defunctorum Item quatuor solidos intrante Mayo pro anima domine Armenie matris sue et animabus omnium fidelium defunctorum Item fratribus et sororibus sancti Laurencii iiij s pro anima Reyuonis socii sui et Bartholomei et animabus omnium fidelium defunctorum in festo sancti Blasii vj vero residue marce ad emendacionem dormitorii nostri annuatim reseruentur ac expendantur Pro hoc vero speciali beneficio vj marcarum quas dictus magister Bartholomeus dormitorio nostro sustinendo assignauit concessimus ei cum specialibus benefactoribus nostris specialem fructum et memoriam in illa Missa [de] Spiritu Sancto que cotidie celebratur ad bonam conseruacionem vite sue et in Missa que cotidie celebratur pro fidelibus defunctis specialem fructum partem et memoriam pro salute anime sue in perpetuum postquam de eo humanitus constiterit Et ne quod absit futuris temporibus aliquis obedienciarius ad quem racione officii pertinebit prouisio vel execucio ordinacionis antedicte in aliquo articulo per ignoranciam se valeat excusare ordinauimus et concessimus hanc nostram salubrem prouisionem singulis annis in nostro capitulo recitandam scilicet die anniuersarii sui Ordinamus eciam et quantum in nobis est concessimus pro nobis et successoribus nostris prefato magistro Bartholomeo vt ipsum plenum effectum ex sua intencione in omnibus articulis prenominatis sine difficultate consequatur in perpetuum et si ausu temerario seu per necligenciam quicquam suis temporibus fuerit omissum quod nichilominus effectualiter et integre suplebitur quam cito fuerit compertum cum graui pena infligenda eidem qui in premissis necligens repertus fuerit aut remissus Que omnia vt perpetuis futuris temporibus stabilem habeant firmitatem nobis in verbo veritatis et in virtute Spiritus Sancti pro nobis et successoribus nostris fideliter promisimus sine fraude et malo ingenio quantum in nobis est obseruaturos ita quod predicta omnia distribuentur et sane et inuiolabiliter inpleantur secundum intellectum ipsius magistri Bartholomei prout superius manifeste est expressum In cuius rei testimonium presenti scripto cyrographato sigill[] capituli nostri vna cum sigillo magistri Bartholomei Chirac de Ferentino altrinsecus sunt appensa Datum apud Cantuariam anno Domini mcclj in festo sanctorum apostolorum Symonis et Iude
Source (click image below to view full size)
institution Institution - an Institution associated with either the giver or receiver of a property transaction in a charter
property Property - a property place location that is a transaction in a charter
issued Issued - the issued at place location for the charter
charter Charter