utl logo
UTL Home | Ethiopia Images | Central and Inner Asia Studies

Charter Document - 03701140

Charter Number: 03701140
Cartulary Title: Charters of Christ Church Canterbury
Charter Language: English
Charter Origin: Royal
Charter Type(s): Grant
Date: 1002 - 1006
Date Type: Assigned
Resource Link(s): eSawyer (S 914) Anglo Saxon Charters (S 914) British Library - Cotton MS Claudius A III (f4r)
map View Map
Charter:
On drihtnes naman ælmihtiges Godes Ic Æðelred mid Godes gyfe Angelðeode cyning and wealdend eac oðra iglanda ðe her abutan licgað cyðe Engliscum cristenum mannum hu se arwyrða arcebisceop ælfric of his bisceoplican wisdome and gymenne me on Godes bebodum oft abysgud hæfð Ic eac ðurh Godes gyfe mine þearfe of ðære godcundan lare and bodunge geornlice understandan wylle and ic ðisne ðeodscype undergyte ðurh manna yfelnysse and unrihtwisnysse eall to wide fordonne and forhergudne Eac betwux minum andgyte ic geseo and soþlice understande ðæt þes ðeodscype ðurh preosta gymeleste wide on ðisum earde þurh ungehealdsumnysse awyrd is and ic Godes ðeowdom aledne and acoledne ðearle behreowsige Sæde ic minum witun ðe me for Gode and for worulde rædað þæs him God andgyt sylð mines modes hohfulnysse Cwædon hi ða ðæt hit ðurh Godes fultum betere wære ðæt ic ða preostas of Cristes cyrcean for hiora openan leahtran and gyltan geutode and Cristes cyrcean mid munechades mannum gesette þe for me and minne leodscype ðærinne woldon rihtlice gebiddon and God gladian Ic ða swa dyde on Cristes cyrcean munecas gesette of ðære bysne ðe sanctus Augustinus hider tobrohte ðæt wæs ðæt he on Cristes cyrcean be sanctus Gregorius hæse and ðæs mæran cinges geðeahte and fultume æðelbryhtes ða haligan munecas ðærinne gesette ðe he hider on eard mid him brohte And ða munecas syððan þurh hira haligan drohtnunga to biscopan gewurdan ðære cyrcean landspede And ðæra muneca ðe ðær niwon inne gelogode synd ecelice on ðisum sunderfreolse ic gestrangige And ðara tuna her on naman awrite þe of ealdum dagum and fram me Angelcinge and eac of oðrum geleaffullum mannum hiderto to ðære halgan stowe gesealde syndon ærest is Eastrige þæt land into Cristes cyrcean for minre sawle ge on lande ge on sæstrande ecelice ic sylle ðonne is Ioccham Bosingtun Edesham and Apeldra Lytle Berewic Swyrdhlincas Preostatun Grauanea Wyllan Ceart Fernleah On Suðsexan Pæccingas On WestCent Meapham Culingas On Suðrian wið Lundenne Wealawyrð eftsona begeondan Tæmese Hrisebyrgan be Cilternes efese to Cristes cyrceantun rihte togelicgende On Eastsexum Lælling On Eastenglum Hædleh And ðær fulgehende Illaleh On Tenet lande sum dæl landes Si æfre ðis forespecen mynster fram eallum eorðlicum þeowdome freoh and mid eallum ðam tunum ðe him to gelicgað þæt is on feldum and on læsewum and on mædum and on wudubearwum and on sealtum merscum and on fiscnoðum and on huntnoðum and on fugelnoðum Butan þysum þrim ðingum þæt is fyrdfærelde and brigcgewurce and burhbote Gyf hwylc welwillendra manna ðysne minne sunderfreols mid godum ðingum geeacnian wylle gemænifylde God ælmihtig his wununge on heofonlicum setlum mid eallum halgum Gyf ðonne hwylc yfel man of deofle onæled sy ðæt he ðisne minne sunderfreols gewanige oððe gelytlige sy he Iudas gefera Cristes belæwendes and sy he toren of hellehundes toðum on ðam egeslicum hellewitum mid eallum deoflum butan ælcum ende butan he hit ær his endedæge rihtlice gebete þæt he wið his drihten manfullice agylte ðonne hit soðlice betere is ðæt man wið synne warnige ðonne hi man geswincfullice bete Ic bidde and halsige ealle geleaffulle mine æftergengan ciningas and bisceopas and ealdormen and þeode wealdendras ðæt ge ne syn Cristes cyrcean reafgendras ac þæt ge syn geornfulle beweriendras Cristes agenre landare and ðara muneca ðe ðær Gode þeowian ðæt ge on ecere reste singal lif and myrhðe habban motan mid eallum his halgum æfre butan ende Amen Ic Æðelred Engla cining þysne Cristes cyrcean sunderfreols on Cristes strengðe getrymme Ic Ælfric Cristes cyrcean arcebisceop þæs godan cinges freols mid rode tacne æfre gestrangie Ic Wulfstan Lundeniscra manna bisceop mines hlafordes dugoðgife æfre geðwærige Ic Ælfheah Wincestriscera manna bisceop þises foresædan cinges bocunge be minre strengðe gefæstnige Ic Ordbyrht bisceop þæt ylce mid Godes bletsunge dyde Ic Æþelric bisceop ðæt ilce dyde Ic Aðulf bisceop ðæt ylce dyde Ic Godwine bisceop eal ðæt ylce dyde Ic Lyfing bisceop mines hlafordes willan and godnysse ecelice getrymme Ic Wulfric abbod soð gewitnys Ic Ælfward abbod ealswa Ic Wulfgar abbod Ic Ælfsige abbod Ic Leofric abbod Ic Wighard abbod Ic Ælfric ealdorman Ic Ælfhelm ealdorman Ic Leofwine ealdorman Ic Leofsige ealdorman Ic Æðelmær mines hlafordes discþen gewitnys Ic Ordulf ealswa trywe gewitnys Ic Eadric trywe gewitnys Ic Byrhtric cinges ðegen gewitnys Ic Æþelric ealda trywe gewitnys Ic Leofric hrægelðen trywe gewitnys Ic Siward cinges þegen æt ræde and æt runan ðisre spræce trywe gewitnys Ic Sigered Siwardes broðor trywe gewitnys Ic Wulfstan ealda gewitnys Ic Wulfstan geonga gewitnys Ic Lyfing soð gewitnys Ic Leofstan gewitnys
institution Institution - an Institution associated with either the giver or receiver of a property transaction in a charter
property Property - a property place location that is a transaction in a charter
issued Issued - the issued at place location for the charter
charter Charter