Charter Document - 03860007

Tempore venerandi presulis Altmanni venit in montem Gotewich quidam presbyter religiosus natione Scottus professione monachus nomine Iohannes quem episcopus ob religionem vite valde dilexit et eum iuxta ecclesiam sancte Marie inclusum fecit Hic verbo et exemplo multum profuit Defuncto episcopo venit inimicus homo qui super bonum triticum ab Altmanno seminatum seminavit zizania et bonam famam fugavit de monte infami infamia Viri namque impudici de locis suis aut expulsi aut fugitivi in Gotewich propter rerum inopiam confluxerunt qui sub obtentu religionis quam specietenus pretulerunt suscepti sunt Horum infandis actibus cepit locus infamari et a gloria prioris status valde obfuscari Cumque in dies infamia longius et latius crebresceret et non modo claustralis religio sed ipsum vulgus montem abhorreret eidem Iohanni incluso Altmannus episcopus in somnis infulatus apparuit ut locum de ceno purgaret et ut fetorem stercoris de monte extergeret admonuit At ille visionem intelligens et preposito fratrum rem aperiens iussit turpes de monte eici deceptos vero ab eis precepit penitentie subici Qui cum infamie notam non possent effugere cogitaverunt omnes locum relinquere Quo comperto Iohannes dedit consilium ut mutarent habitum et sic evaderunt tam infamis facti opprobrium Fit consensus omnium eligitur professio monachorum Mox Counradus prepositus huius rei gratia mittitur Romam ut ab apostolico impetraret huius permutacionis licentiam Qua impetrata cum gaudio remeat Oudalrico bone memorie episcopo Altmanni successori consensum Romani pontificis nuntiat consilium suum super hoc negotio postulat Cuius consilio Hartmannus [] abbas eligitur cuius religionis et eloquentie fama ubique divulgabatur qui tunc temporis in monasterio Sancti Blasii prioratus officio fungebatur [] Igitur Hartmannus cunctis flentibus de Sancto Blasio cum religiosis viris Gotewich proficiscitur ibi ab omnibus favorabiliter excipitur ab Oudalrico episcopo abbas preficitur sub quo omnes monachicum habitum sumunt sancti Benedicti regule colla devoti submittunt [] Hartmanni exhortatione multi nobiles relicto seculo ad deum convertuntur multa predia et beneficia per eum monasterio conferuntur Hic honorem loci edificiis libris picturis palliis et religiosis viris ampliavit et tempora sua honestate et probitate perornavit Erat enim summo religionis studio deditus prudentia tam seculari quam spirituali eximie preditus copiosa disertus eloquentia morum exuberans elegantia Unde principibus totius regni erat acceptissimus et ipsi regi Heinrico familiarissimus qui et eum in archiepiscopatu Iuvavensi sublimare disposuit sed zelus Oudalrici Pataviensis episcopi eum prohibuit qui eum sibi in dignitate preferri doluit Rex tamen eum in regali abbatia Campedonensi prefecit et episcopus Augustensis eum abbatie Sancti Oudalrici pretulit necnon et dux Karinthie abbatiam Sancti Lamperti ei commisit