Charter Document - 03860138

Ich Alber von R[otenstain]a vergich an disem brief und tun chunt allen den [di nue sint und hernach] chuenftich werdent daz ich mit gutem willen miner mu[eter fraw]en Offeney und min[er zwayer swestern] frou Margreten und frou Elzbeten han gegeben dem gotshause und [der] samnung [zu Gottwey] meines rechten aigens ein lehen daze Goeznich daz Rueger der Steger ze pur[chrecht hat daz] selb lehen mit alle den daz darzu gehoeret ze dorfe und ze velde han ich ge[geben dem goczhaus] ze Choetweig ze vodrist durch got und durch miner sel willen und umb [syben pfunt pfenning] di hat man mir d[arumb] gegeben und han ez gegeben dem gotshause mit soe[ttner beschaidenhait] daz es Ruger [der Steger] und sein erben sullen haben ze rechtem purchrecht [und sullen davon] dinen zehen pf[ennig alle iar a]n sand Michelstag Darzu han ich gelob[t dem erbern abbt] und der samnunge [zu C]hoetweig daz ich in dazselb lehen sol ze recht shermen [als aigens recht ist] in dem lande und [wa] in des gebristet oder abget daze mir swelhen shaden [sy des nement] daz sullen si haben ouf allem minem aigen swa ich ez han in dem lande und dar[uber gib ich in disen] brief zeinem ebigen urchuend verinsigelten mit minem insigel und wa[nn mein mueter und mein] sw[estern selb n]icht insigel habent so habent nach ir pet her Levtold von Ch[uenring und her Ortlieb] von [Winkchel] ir insigel an ir stat gegeben zeinem urchuend daz ir gut [wille bey der sache ist] gewesen Des sint ziug Weichart von Planchenstayn Ott von Weizzenberch [Wulfing und] Wern[hart] von [dem] Haevslein Virich der Plum und ander piderb laeut Der b[rief ist gegeben dacz Wisendarff da] von Christes ge[burt waren zer]gangen tousent iar [zway] hundert [iar an dein syben und neunzkisten iar] an sand [Peterstag]