Charter Document - 03900057

Ich Vlrich herrn Starchandes svn von Nuzdorf vergihe vnd tuen chunt allen den die disen brief lesent oder horent lesen di nv lebent vnd her nach chunftich sint daz ain chriech waz zwischen der erbern vrown vron Margreten vnd irem stief svn Seifriden paidenthalben vmb ir erbe gut den selben chriech liezzen sie vnverschaidenleichen mit guetem willen an alles geverde an die erbern vier man an Maister Dietreichen ze den zeiten vnser genädigen vrown schreiber vrown Elspeten der herczoginne in Osterreich an hern haymen herrn Otten svn zu Wienne an herrn Otten sein prveder vnd an hern Chonraten den Huebmaister Die habent ez also zwischen in verscheiden daz vrown Margret haben sol den hof zv Mevrlinge mit allev dev vnd dar zv gehoret versuecht oder vnversuecht swi so ez benant ist Ez hat auch ir stief svn Seifrit sich des selben hofes rechtes fuerzicht getan vnd ist auch seiner stief mueter vrown Margreten bestetiget mit meiner hant wan ich amptman vnd phleger zu den zeiten waz von meines herren genaden Bropst Hadmares dez Gotshaus ze Newnburch vnser vrown So habent sev beschaiden dem egenanten Seifriden irem stief svn zwene hofe ze ien VI Gvmpendorf auch mit alle dev vnd dar czv gehoret versuecht oder vnversuecht swie so ez benant ist also daz ir ietweders fuerbaz mit seinem erbe guet svl allen seinen frumen schaffen verchauffen verseczen vnd geben swem si wellen an allen irrefal vnd an alle ansprache vnd auch also mit angenomener rede swelichez daz ist vnder in paiden daz die vorgesprochen schiedvnge nicht stet hiet oder die zebreche mit worten oder mit werichen der sol geben ze vberweite den schiedlevten hvndert phvnt vnd hvndert phvnt swer zu den selben zeiten richter ist ze wienne Daz disev schiedvnge fuerbaz stet beleibe dar vber so gib ich vorgenanter Vlrich disen brief ze ainem offen vrchvnde vnd ze ainem waren gezevge diser sache versigelten mit meinem insigel vnd mit der vorgenanten hern haymen vnd hern Otten insigeln die diser sache ware geczevge sint mit iren insigeln Vnt sint auch des gezevge her Chvnrat von praitenvelde her hainreich sein pruder her Marquart von praunspach der Geveterl Maister perchtolt der schuczenmaister fridreich der amman von Otackeringe fridreich sein svn Eber hinder dem neunmarchte Eber der amman auf der widerinne Hainreich der zypf Eberhart von Meuerlinge Gundaker der Maurren prueder vnd ander frume levt genuech den disev sache wol chont ist Diser prief ist geben ze wienne do von christes gepvrte waren ergangen Tausent jar zwai hundert iar in dem sechs vnd newnzigisten iar des nachsten Mentages nach dem aufferte tage