Charter Document - 04000107

Wir Ruger vnd Ottacher von Biberstein tven alle den chunt di disen brif ansehent oder hoernt lesen daz wir durch vnsers vater willen vnd ouch etlichmazze vmb phenning haben gegeben mit verdahtem mvet vnd mit gutem willen vnser vrowen sant Marien ze Wilhering vnd den brudern di da vnserm herren von himelreich dinent alle den erbetail der vns ze recht an erbet von vnserm vater hern Hainrich dem Pyber dez got genaedichlich gedenchen sol an dem aigen ze Biberowe vnd datz chunnode versucht vnd vnuersuht reht alz ez vnser vater vnd wir her bracht haben also daz ez daz vorgenant Chloster ze Wilhering in rehter aigens gewer haben sol immer mere ledichlich an alle ansprach Wand aber vnser feter her Arnold der Pyber von Helfenberch daz vorgenant aigen ze Biberowe versacet het hern Sigharten dem Gnevssen durch sin vanchnvzze mit vnserm willen so tv wir chunt an disem brief daz di vorgenanten bruder von Wilhering daz selb aigen datz dem Gnevssen erlost habent mit vnserm willen vnd mit aigen phenning Wir offen auch daz an disem brief daz wir selbe vnd vnser Hovsvrowen vnser chint ouch ouf dem vorgenanten aigen reht vnd redlich vnd gentzelich furtziht getan habent vnd ouch daz wir gelobt habent vnd noch loben daz wir dezselben aigens ze Biberowe vnd ze Chunnode halbes dez Chlosters gewer sin sullen ze hove vnd ze taiding als reht ist entu wir dez niht swelchen schaden daz vorgenant Chloster vnd die brveter do von nemen den schullen wir in abtvn Wand aber dazselbe aigen zwischen vns vnd vnserm vetern hern Arnold vnd sinen chinden mit reinen niht anders getailet ist daz man ez tailet mit schobern ouf der wise oder mit fudern in dem holz als ez her chomen ist so tv aber daz chunt ob ez vnser veter oder swer ez von im hat niht also stete haben wil daz wir ez mit im reinen vnd tailen schullen als reht ist vnd schullen aber dez selben tailez vnd der taillunge dez chlosters gwer sin als wir vor gelobt haben Dar vber hab wir disen brif geschriben vnd haben in gegeben dem Chloster vnd den brudern ze einem vrchunt gar wol vnd vil getreuleich gefestent mit vnserm insigel vnd mit den gezivgen di hi geschriben stent daz sint vnser herren baide her Wernhart vnd her Hainrich von Schounberch her Sighart vnd her Ottaker her Alber vnd her Peter von Lobenstein her Wernhart von Mezzenbach Fridrich Chunrat vnd Sighart di Biber von Rotenekk her Eberhart von Tobel her Herman Gneiss her Wernhart von sand Vite Wernhart vnd Heinrich vnd Marquard di Gnevsse Ditrich der Amman Eberlin vnd Ebran von Wessenberch Vlrich vnd Marquart di Pirchinger Herwort Chunrat Chol vnd Ortolf di Berndorfer Sybot der forster Ott der alt richter Arnold von Lobenstein vnd ander di dabei waren Der brif ist gegeben vnd geschriben da von Christes Geburd waren Tausent jar vnd zwaihundert jar vnd fumf vnd ohtzich iar nahen bi sant Jacobes Tage