Charter Document - 04050110
Charter Number: 04050110
Cartulary Title: Chartularium Sangallense III [St. Gallen]
Charter Language: Latin
Charter Origin: Religious
Charter Type(s): Decree
Date: 1243
Date Type: Internal, A.D., Feast
Resource Link(s): Monasterium.net
View Map
Cartulary Title: Chartularium Sangallense III [St. Gallen]
Charter Language: Latin
Charter Origin: Religious
Charter Type(s): Decree
Date: 1243
Date Type: Internal, A.D., Feast
Resource Link(s): Monasterium.net
View Map
Charter:
Omnibus presentem paginam inspecturis S prepositus de Curvvalde [et Vol dictus de Jvualt] prepositus Curiensis iudices a sede Magunt[ina] delegati salutem in omnium salvatore Cum olim venerabiles in Christo abbas de Altorf Argent[inensis] diocesis et magister C scolasticus Argent[inensis] cuiusdam auctoritate rescripti a iudicibus Magunt[ine] sedis ad ipsos obtenti abbatem et conventum monasterii sancti Galli civissent super discussione cuiusdam sententie que pro predictis abbate et conventu sancti Galli super possessionibus in Norsing[in] sitis contra abbatissam et moniales de Oberiet a domino Constantiensi episcopo loci ordinario fuerit promulgata nos eidem abbati et scolastico per literas nostras inhibuimus ne in causa ipsa procedere aliquatenus attemptarent eo videlicet quod ipsorum iurisdicio per posteriores literas ab eisdem iudicibus Mag[untine] sedis ad nos obtentas extitit evidentissime revocata adicientes quod si procederent scirent se excommunicationis vinculo innodatos Verum prefati abbas et scolasticus post inhibitionem et excommunicationem huiusmodi in causa ipsa sententias quasdam interlocutorias tulisse dicuntur Quod si verum est nos predictas sententias interlocutorias et quicquid post inhibitionem et excommunicationem nostram in causa ipsa fuerit temere attemptatum cum excommunicati ab omnibus legitimis actibus sint exclusi inirritum revocamus vel potius irritum pronuntiamus predictam excommunicationis sententiam in abbatem et scolasticum si sic perperam processerunt innovantes Dat Curie anno domini MCCXLIII post epiphaniam domini die secunda