utl logo
UTL Home | Ethiopia Images | Central and Inner Asia Studies

Charter Document - 04210081

Charter Number: 04210081
Cartulary Title: Oberösterreichisches Urkundenbuch, weltlicher Teil (540 - 1399 [1350])
Charter Language: Latin
Charter Origin: Papal
Charter Type(s): Mandate
Date: 1151
Date Type: Internal, A.D., Calendar, Papal
Resource Link(s): Monasterium.net
map View Map
Charter:
Eugenius episcopus seruus seruorum dei dilectis filiis Friderico abbati sancte Marie in Pomgartenberge eiusque fratribus tam presentibus quam futuris monasticam uitam professis in perpetuum Religiosam uitam eligentibus apostolicum conuenit adesse presidium ne forte cuiuslibet temeritatis incursus aut eos a proposito reuocet aut robur quod absit sacre religionis infringat Ea propter dilecti in domino filii uestris iustis postulacionibus clementer annuimus et monasterium beate Marie in Pomgartenberge in quo diuino mancipati estis obsequio sub beati Petri et nostra protectione suscipimus et presentis scripti patrocinio communimus Statuentes ut quascumque possessiones quecumque bona eadem ecclesia inpresentiarum iuste et canonice possidet aut in futurum concessione pontificum largitione regum vel principum oblatione fidelium seu aliis iustis modis deo propitio poterit adipisci firma uobis uestrisque successoribus et illibata permaneant In quibus haec propriis duximus uocabulis annotanda Locum in quo ipsa abbatia sita est cum appenditiis suis Grangiam in Nodemestorf cum appenditiis suis Grangiam Tymnich cum appenditiis suis Grangiam Gozoltingen cum pertinentiis suis Grangiam Teuphenbach cum pertinentiis suis Modmesecche cum pratis et pascuis De silua Nordica triginta mansos Grangiam de Cremesa cum agris et uineis suis et Decem mansos de silua in nochelinge Sane laborum uestrorum quos propriis manibus aut sumptibus colitis siue de nutrimentis uestrorum animalium nullus omnino a uobis decimas presumat exigere Oleum uero infirmorum consecrationes altarium seu basilicarum benedictionem abbatis ordinationes monachorum qui ad sacros ordines fuerint promouendi a dyocesano suscipietis episcopo siquidem catholicus fuerit et gratiam atque communionem apostolice sedis habuerit et ea gratis et absque prauitate uoluerit exhibere Alioquin liceat uobis catholicum quem malueritis adire antistitem qui nostra fultus auctoritate que postulantur indulgeat Decernimus ergo ut nulli omnino hominum liceat praefatum monasterium temere perturbare aut eius possessiones auferre seu ablatas retinere minuere uel aliquibus uexationibus fatigare Sed omnia integra conseruentur eorum pro quorum gubernatione ac sustentatione concessa sunt usibus omnimode profutura Siqua igitur in futurum ecclesiastica secularisue persona hanc nostre constitutionis paginam sciens contra eam temere uenire temptauerit secundo tercioue commonita nisi presumptionem suam congrua satisfactione correxerit potestatis honorisque sui dignitate careat reamque se diuino iudicio existere de perpetrata iniquitate cognoscat et a sacratissimo corpore ac sanguine dei et domini redemptoris nostri Jesu Christi aliena fiat atque in extremo examine districte ultioni subiaceat Cunctis autem eidem loco sua iura seruantibus sit pax domini nostri Jesu Christi quatenus et hic fructum bone actionis percipiat et apud districtum iudicem premia eterne pacis obtineat Amen Amen Amen Eugenius catholice ecclesie episcopus subscribo [Sequuntur subscriptiones undecim Cardinalium] Datum ferentini per manum Bosonis sancte Romane ecclesie scriptoris X Kl Julii Indictione XIIII Incarnationis dominice Anno MCLI Pontificatus uero domini Eugenii pape III anno septimo
institution Institution - an Institution associated with either the giver or receiver of a property transaction in a charter
property Property - a property place location that is a transaction in a charter
issued Issued - the issued at place location for the charter
charter Charter