Charter Document - 04230168

Omnibus Christi fidelibus presentibus et posteris presentium inspecturis Nos comes Dionisius et magister tavarnicorum regine Hungarie Nicholaus comes de Chenagd Lucas comes Huntiensis et Nicholaus vice curie regis iudex significamus quod populi castri Vesprimiensis et populi castri Lauriensis una cum iobagionibus castrorum eorundem requirebant coram nobis quandam terram nomine Scezu X aratrorum de abbate Beati Mauricii de Bely contra quos dictus abbas terram nominatam ecclesie supradicte privilegio Sancti Ladizlai regis circumquaque metis assignatam asseruit confirmatam et quod vocibus protulerat privilegio beatissimi regis Ladizlai comprobavit Licet causa partium adversarum quam diu coram rege Bela tertio et aliis suis iudicibus et coram nobis fuisset ventilata tandem in litteris domini nostri regis Bele et in litteris trium iudicum a rege constitutorum videlicet Chako comite Supruniensi et Haholth comite de Ferreo Castro Luce comite Musuniensi ecclesie sepe dicte terram Scezv diu nominatam prospeximus perpetuo restitutam Nos quidem recto tramite iudicum procedentes iuxta tenorem per enarratorem litterarum eidem ecclesie decrevimus perpetuo resignantes statuendam mediante pristaldo cause magistro Stephano canonico Albense penam insuper adiecimus ut si qua partium apte dicta sententia resilire presupserit ipso facto calumpniator habeatur Ut autem presens pagina vigore perpetuo fulciatur sigillorum nostrorum munimine studuimus roborandam