Charter Document - 05030952

A tous ceus qui ces présentes lettres verront Renaut d'Anvers prévost de Montlehery saluz Sachent tuit que par devant nous [vind]rent Arnoul Bomerche de Chaumuçon et Clémance sa fame cognurent en droit eus avoir vendu et par titre de vente quittèrent et dou tout delessièrent desores à toutjouz mes à Thomas Mabre dou Pont de Chartres et à ses hers quatre arpenz de terre assis ou Vau de Verrilles si comme il se comportent en lonc et en lé que il avaient [] pesiblement dou propre héritage à ladite Climance si comme il disaient tenenz à la terre aus Moines Blanz d'une part et d'autre au friches à la damoiselle de Villers movent dou prestre de Villejust à deus soubz parisis de cens pour le pris de sexante et dix soubz parisis que il ont euz et receuz dou dit acheteur en bone peccune nombrée si comme il confessèrent et se teindrent à bien poiez par devant nous prometenz [] Après ce par devant nous vindrent Jehan le Forestier et Adart sa fame de Chaumuçon loèrent et acordèrent la vente desus dite et quittèrent tout tel droit comme il avaient et comme il atendaient avoir par queque reson que ce feust Ou tesmoing de laquele chose nous à leur requeste et à la requeste desdits vendeurs avons scellé ces lettres dou seel de ladite prévosté l'an de grace M II IIII et seize le vendredi devant la sainct Barnabé l'apostre