Charter Document - 05041009

A touz ceus qui ces présentes lettres verront Pierres li Jumiau garde de la prévosté de Paris salut Nous fesons à savoir que par devant nous vint en jugement Thiessot de Sernai nièce de feu Baudoin du Bourcnoef si comme elle disoit et recognut en droit que elle avoit quittié et quitta par devant nous desorendroit à touzjourz à religieus home l'abbé et le couvent des Vauls de Sarnay et à leur successeur tout le droit et toute l'action la saizine propriété et possession que elle avoit et povoit ou devoit avoir par quelque droit ni cause que ce soit en une pièce de terre assize ou Clos as Moines devant le cimetière de la ville de Sarnay et transporta par devant nous és diz religieus et en leur successeurs à touzjourz tout le droit et toute l'action que elle avoit et povoit et devoit avoir encontre la pièce de terre desus dite pour le pris de cent solz de tournois que elle en avoit ja eu et receu desdiz religieus [] En tesmoing de ce nous avons mis en ces lettres le seel de la prévosté de Paris l'an de grace mil trois cenz et trois le mercredi après la feste saint Louys