Charter Document - 05190314

Universis sancte matris ecclesie filiis ad quos pervenerit hec scriptura Rogerus permissione divina Conventr et Lych episcopus salutem in eo qui est omnium vera salus Licet dudum bone memorie magister Radulphus de Chaddesdene thesaurarius nostre ecclesie Lych predicte et rector ecclesie de Sallowe dum adhuc viveret presbyterum missam de beata Maria Virgine celebraturum in capella in honorem eiusdem Virginis per ipsum iuxta latus ipsius ecclesie de Sallowe constructa perpetuis temporibus salubriter ordinasset qui ab abbate et conventu de Burton super Trentam pro stipendiis suis annuatim c solidos perciperet sicut in littera obligatoria eorundem religiosorum super hoc confecta plenius continetur Domos et mansum etiam cum pertinentiis haberet que idem magister Radulphus per cartam suam eidem contulit et concessit Dictus tamen magister Radulphus quis eundem presbyterum preficeret ac onera ipsius capelle ornamentorum et aliorum cantariam eandem contingentium sustineret nullatenus ordinavit Volentes igitur huiusmodi pium propositum iuxta sue voluntatis arbitrium confovere ne cantaria eadem quod absit pereat infuturum de consensu expresso dilectorum filiorum magistri Alani dicti Briton tunc thesaurarii ecclesie memorate domini Willelmi de Chaddesden fratris sui germani militis heredis et executoris ipsius magistri Radulphi ac etiam magistrorum Willelmi de Henovere et Hugonis de Eyton executorum eiusdem taliter in hac parte duximus ordinandum videlicet quod prefatus magister Alanus qui nunc est et alii thesaurarii ecclesie Lych qui pro tempore fuerint capellano predicto cedente vel etiam decedente alium capellanum infra sex septimanas a tempore mortis ipsius vel cessionis virum sufficientem ad illud officium et ydoneum bone conversationis et honeste preficient et subrogare studeant loco sui Alioquin nos et episcopi nostri successores qui pro tempore fuerint infra xv dies capellanum ibidem celebrantem preficient ea vice quod si sedes episcopalis vacaverit vel episcopus qui pro tempore fuerit id non fecerit tunc decanus et capitulum Lych ecclesie preficiendi ibidem presbyterum huiusmodi liberam habeant facultatem Thesaurarius vero qui pro tempore fuerit ad quem prefectio eiusdem presbyteri pertinebit omnes refectiones capelle predicte et casularum eiusdem capelle sustinebit infuturum Capellanus vero qui pro tempore fuerit ibidem prefectus omnia alia ornamenta eidem capelle incumbentia sustineat infuturum contigerit episcopis et decanis qui pro tempore fuerit solvere demandare procurent ut sic ad denuntiationem ipsorum si prius reperti non extiterint confestim per eorum diligentiam valeant congrue reparari In cuius rei testimonium impressio sigilli nostri presentibus est appensa Dat apud Rollesham nonas Augusti anno Domini MCCLXXX ix et consecrationis nostre tricesimo secundo