Charter Document - 05190634

Universis sancte matris ecclesie filiis presens scriptum visuris vel audituris Rogerus permissione divina Coventr et Lych episcopus salutem in omnium salvatore Cum secundum apostolicum operari debeamus bonum ad omnes et maxime ad eos qui per devota pietatis opera domesticos fidei se esse demonstrant et relictis vagis mundi discursibus sub arte religionis observantia muro se muniunt honestatis per variosque virtutum gradus scandere satagunt ad artem beatudinis ex qua dependet omnis armatura fortium et bonorum omnium magnitudo ac dilecti filii prior et conventus sancti Thome martiris iuxta Stafford ecclesiam Stowye nostre dioecesis in qua ius obtinent patronatus dispositioni et ordinationi nostre simpliciter et absolute duxerint supponendam ut nobis secundum voluntatis nostre arbitrium liceret disponere de eadem prout in instrumento ipsorum super hoc confecto in hec verba [] nos cum capitulis nostris Coventr et Lych super hoc tractavimus diligenter et eorum interveniente assensu per litteras suas patentes expresso quarum is est tenor [] attendentes igitur summe devotionis affectum dictorum prioris et conventus qui elemosinarum largitionibus hospitum receptioni et aliis caritatis operibus ad quorum sustentationem pro multitudine pauperum ac hospitum ibidem confluentium proprie non suppetunt facultates relegata procul avaritia vacent more cotidiano de virtute in virtutem gradientes ut misericordie operibus hospitum et egenorum necessitatibus pie subveniendo eo liberalius possint intendere quo monasterii sui facultates susceperint incrementa invocata spiritus sancti gratia de prefata ecclesia Stowye presenti ordinatione disponentes ipsam ecclesiam predictis priori et conventui ac eorum successoribus suoque monasterio ad pauperum et hospitum ibidem declinantium sustentationem concedimus et appropriamus cedente vel decedente Roberto de Braydeshale eiusdem ecclesie nunc rectore cum omni integritate et pertinentiis suis perpetuis possidendam temporibus et habendam assignantes predictis priori et conventui quatuor solidos annuos quoad vixerit dictus Robertus rector ecclesie antedicte de consensu eiusdem rectoris nomine personatus de bonis ipsius ecclesie ab eodem rectore in festo sancti Michaelis archangeli percipiendos Verum quia divinis preceptis et apostolicis monitis incitamur ut pro statu ecclesie nostre Lych cui licet inmeriti presidemus inpigro vigilemus affectu et in hoc officii nostri debitum persolvimus et laudabilem prosequimur actionem si non solum ipsius ecclesie nostre necessitates satagimus levigare verum etiam ipsius incrementa prospicere ut valemus precipue cum in officiis caritatis illis precipue obnoxii teneamur a quibus beneficia precipua dinoscimur percepisse ordinamus et ordinando statuimus ut de fructibus dicte ecclesie Stowye cum ipsam proximo vacare contigerit dicti prior et conventus et eorum successores solvant singulis annis in perpetuum ad augmentationem communie canonicorum ecclesie cathedralis Lych communeri dicte ecclesie qui pro tempore fuerit decem marcas bonorum et legalium sterlingorum in octabis sancti Michaelis archangeli pontificali auctoritate statuentes ut dicti prior et conventus eorumque successores dictam ecclesiam Stowye cum pertinentiis suis in quibuscunque consistant ex hac ordinatione nostra et concessione futuris et perpetuis temporibus pacifice ut supra tactum est et inconcusse possideant reservata nobis et successoribus nostris potestate taxandis vicariam competentem in ecclesia antedicta ad quam dicti prior et conventus ac eorum successores quotienscumque vacaverit nobis et successoribus nostris personam ydoneam presentabunt qui onus procurationum et alia onera ordinaria ad nos vel successores nostros seu locorum archidiaconos qualitercumque spectantia in perpetuum sustinebit salvis in omnibus iure et auctoritate pontificali nostra et successorum nostrorum ac ecclesiarum nostrarum Coventr et Lych dignitate In cuius rei testimonium fidem et evidentiam pleniorem sigillum nostrum apposuimus huic scripto