Charter Document - 05260003

H[] diuina permissione tituli Sancte Pudentiane presbiter cardinalis uniuersis Christi fidelibus presentes litteras inspecturis salutem et sinceram in domino charitatem Nouerit uniuersitas vestra quod procurator decani et capituli capelle ducis diuionensis indulgentiam a sede apostolica impetrauit cuius tenor talis est [] Procurator vero venerabilis patris lingonensis episcopi et abbatis et conuentus Sancti Stephani diuionensis lingonensis diocesis eidem indulgentie in audiencia publica contradixerit Super qua nos dominus papa dedit eisdem procuratoribus auditorem inter quos cum fuisset in presentia nostra diutius altercatum tandem procurator predictorum decani et capituli petiit a procuratore dicti episcopi et abbatis et conuentus quod absolueret indulgentiam memoratam et ipse per litteras nostras caueret eidem solemniter promittendo procuratoris nomine pro decano et capitulo capelle ducis quod non obstante indulgentia ipsa episcopus et abbas et conuentus iamdicti vel successores eorum possent predictos decanum et capitulum per litteras apostolicas vel legatores apostolice sedis in iudicium trahere per duas dietas non a prefata capella sed a finibus lingonensis diocesis computandas Ita quod per ipsam indulgentiam sepedictis episcopo et abbati et conuentui Sancti Stephani preiudicium nullum fiat et quantum ad ipsos episcopum ac abbatem et conuentum perinde habeatur ac si non fuisset penitus impetrata Cum igitur omnia supradicta procurator decani et capituli procuratori predictorum episcopi et abbatis et conuentus solemniter promiserit coram nobis nos ad petitionem utriusque partis in testimonium facte promissionis et inter procuratores ipsos taliter acceptate ne per dictam indulgentiam lingonensi episcopo vel abbati et conuentui iamdicto possit imposterum preiudicium generari presentes litteras fecimus sigilli nostri auctoritate muniri Ut autem hoc factum robur maioris obtineat firmitatis venerabiles patres Sancte Marie transtiberym presbiter cardinalis ac R Sancte Marie in cosmidin diaconus cardinalis huic scripto ad petitionem procuratorum utriusque partis sigilla sua apponi fecerunt Datum Anagnie XIIII calendas octobris pontificatus domini Gregorii pape noni anno quarto