Charter Document - 05450006

Alexander dei gratia Linc episcopus universis sancte ecclesie fidelibus salutem Benedictus deus cuius nomen gloriosum in secula quam sicut ecclesiam suam novo semper fetu multiplicat ita eam nostris temporibus novo lumine sancte religionis illustrat dum fidelium devotione crescente ad ipsius laudem nove fundantur ecclesie quatinus in omni loco dominationis eius omnis anima deum benedicat et laudet Qui cum in sanctis suis semper sit et ubique mirabilis mirabilem sue virtutis declarat operationem in venerabili sanctarum conventu mulierumque in religioso habitu degunt in Godestow sub providentia et regimine memorabilis matrone deo devote Edithe que loci illius ecclesiam proprio sumptu et labore collatisque fidelium elemosinis in honorem sancte dei genetricis virginis Marie et beati Johannis baptiste a primo lapide prudenter edificavit ac deo cooperante ad finem usque perduxit Quod si gaudium est immo quia certe gaudium est angelis dei super uno peccatore penitentiam agente multo amplius super innumeris memoratis famulabus Christi presentibus et adhuc futuris quarum tota vita penitentia totus in deo affectus quarum incolatus in terra sed conversatio in celis Que in carne preter carnem viventes Christo sponso se eternaliter devoverunt et carnalia in se crucifigentes desideria vicia carnis aut per experientiam ignorant aut resistendo devicerunt Ad huius ecclesie dedicationem celebrandam anno ab incarnatione domini MCXXXVIII regnante in Anglia piissimo rege Stephanus imperii ipsius anno quarto convenerunt predictus rex et uxor eius Matildis regina comites et barones necnon et pontifices Theobaldus archiepiscopus Cantuariensis Rogerus episcopus Saresberiensis Simon Wigornensis Robertus Exoniensis Robertus Battoniensis Algarus Constantiensis quorum minister ego Alexander qui deo disponente universe illius parrochie regnum preeram sancte Marie matris ecclesie Lincoliensis in illa sede presul tercius predictis fratribus nostris suffragantibus cooperante virtute Sancti Spiritus et gratia ministerium dedicationis explevi Et quoniam hiis que in presentia nostra gesta sunt veritatis testimonium negare non possimus presentium iudicio litterarum notum facimus tam presentibus quam futuris ea que in hac subscriptione habentur in dotem eiusdem ecclesie tanta devotione a fidelibus fuisse oblata data et concessa ut priorum exemplo ad mutationem valeant mentes sequentium animari Rex dedit de proprio dominio suo C solidatas terre in vico qui dicitur Waltona et uxor eius Matildis regina x marcatas Et Eustachius filius suus centum solidos in denariis donec terram haberet Et Theobaldus Cant archiepiscopus C solidatas Et ego Alexander Linc episcopus dedi C solidos de theloneo Bannebirie Et Robertus episcopus Exoniensis xl solidos dedit in duabus ecclesiis scilicet xx in ecclesia sancte Marie Glowcest et xx in Fered Et Rogerus Saresb episcopus quoddam molendinum quod vocatur Boiemulna cum terra que eidem adiecet Et abbas de Westimonasterio lx solidatas Et Ingulfus abbas Abbendone lx solidatas Et Johannes de Sancto Johanne unum molendinum de iiii li in Wlgaricota et mansuras duorum hominum cum appendiciis et particulam terre ante portam prefate ecclesie in insula que interjacet duabus aquis et dimidium prati quod dicitur Lambeia Robertus de Olleio dedit alteram medietatem eiusdem prati scilicet Lambeie et unum modium frumenti unoquoque anno Et Milo constabulus Gloecestr xx solidatas Et cives Oxinefordie dederunt terram in Portmaneit quam tenuit Segrunus Robertus comes Leercestr et uxor eius comitissa Amicia dederunt lx solidatas terre in Halso Et Hugo de Tiwe dedit ix solidatas in Oxeneford Et Sevarus in eadem villa vii solidatas apud Lundonias in Estchep ix solidatas Et Rogerus de Almereio xxv acras unoquoque anno ad seminandum in Blechesdona et totidem ad waretandum Et Galterus de Peri unam virgatam terre et v acras in eadem villa Et Raginaldus de Sancto Walerico dedit et concessit Heringesham et Boreham et i piscariam cum appendiciis et totam insulam infra duos pontes et supradicta que Johannes de Sancto Honore dedit in dedicatione memorate ecclesie Et Edwinus filius Godegosii ecclesiam Sancti Egidii que est extra Oxineford et ex altera parte eiusdem ville versus Abbendonam xviii solidatas Robertus de Witham particulam prati iuxta ecclesiam de Godestow Radulfus filius Rogeri v solidatas in Sipetuna Nicholaus Basset i hidam terre apud Risendunam Et Simon de Wahelle dimidietatem ecclesie de Pateshilla cum pertinentibus Rex etiam Stephanus concessit eis nundinas trium dierum in festivitate sancti Johannis baptiste Et Galterus archidiaconus Oxineford dedit decimam dominii sui de Cudeslaua Hec omnia dominus Albericus Hostiensis episcopus qui tunc in Anglia Sancte Romane ecclesie legatione fungebatur apostolica auctoritate sancivit Hec Rex Stephanus regie potestatis privilegio roboravit Hec Theobaldus archiepiscopus totusque noster episcoporum conventus episcopali auctoritate confirmavit sicque omnes pari assensu pari voto unaque voce perpetui decrevimus anathematis sententie subiacere quicumque deinceps de beneficiis quibus predicta dotata fuerat ecclesia vel quibus adhuc deo volente canonice in futurum augmentanda erit Aliquid ausu temerario invadere auferre minuere seu in deterius mutare presumpserit nisi condigna satisfecerit penitentia Predictorum autem largitoribus benefitiorum dominus Albericus legatus unum annum de iniunctis penitentiis vice apostolica relaxavit et xl dies singulis annis omnibus qui in die Sancte Prisce virginis vel in natali beati Johannis baptiste eandem ecclesiam devoto corde visitaverint Et nos canonici sancte Marie matris ecclesie Linc pontificis nostri Alexandri litteris subscribentes deum in suis donis benedicimus et nostre humilitatis orationes concedimus omnibus qui in predictis festivitatibus ecclesiam illam pio dei amore visitaverint et beneficiorum suorum suffragio predictas Christi famulas in dei servitio confortaverint