Charter Document - 05610288

Cest endenture entre monsieur Henry le Vavasour de une parte et le priour de Alvingham et le covent de mesme leu dautre parte tesmoynge qe cum le dit monsieur Henri demanda vers le dit priour un molyn od les aportenauntez en Cokerington devaunt les justicez de baunk par un cessavit per biennium ou le dit priour contrepleda par quay debate feust entre eux de mesme le molyn sy qe par comuns amicys apres acord se prest entre eux en tien manere qe le priour et son covent ount grantez a le dit monsieur Henry qe y ferront defaut apres defaut en mesme le bref et assentront et suffront qe le avandit monsieur Henry recovera le dit molyn par defaut apres defaut et qe il ne son covent ne mettront desturbaunce ne nule manere de delay par essoin ne en autre manere par qe le dit monsieur Henry sayt delaye de son recovereyr du molyn avandit Et aceo coveaunt loialment tenyr et parfayere le dit priour et son covent sez obligent par cest escrit Et sy le dit priour et son covent en les covenaunt avandit en nule poynt defaliont le avandit priour et son covente de cel houre en avant sez obligent estre tenucz audite monsieur Henry et a sez heyres en vynt luvres desterlynge a payer a luy a Cokerington a la volunte le dit monsieur Henry et a sez hereys en tesmoynaunce de qel chose le dit priour et son covente lur comune seal de Al et [le] dit monsieur Henry son seal entrechaungeabilment ount mys Donez a Nicol le jour de saynt Barnabe le apostoil lan du reng le roy Edward tierce apres le conqueste quint