Charter Document - 06059013

H dei gracia [] maiori et balliuis suis Oxonie salutem Cum dudum ad pacem et tranquillitatem Uniuersitatis scolarium Oxonie prouiderimus et per cartam nostram concesserimus quod quatuor Aldermanni fierent in Oxonia et octo de discrecionibus et legalioribus burgensibus eiusdem uille associarentur ipsis Aldermannis qui omnes iurarent nobis fidelitatem et essent assistentes et consulentes uobis ad pacem nostram conseruandam ad assisas dicte uille custodiendas et inuestigandum malefactores et perturbatores pacis nostre et uagabundos de nocte et receptatores latronum et malefactorum et corporale prestarent sacramentum quod omnia predicta obseruarent et quod in qualibet parochia uille Oxonie essent duo homines electi de legalioribus parochianis et iurati quod in qualibet quindena inquirerent diligenter ne quis suspectus hospitaretur in parochia et si aliquis receptauerit aliquem per tres noctes in domo sua responderet pro eo et quod regratarius non emeret victualia in uilla Oxonie uel extra uersus uillam ueniencia nec aliquid emeret nec iterum uenderet ante horam nonam et si faceret amerciaretur et rem emptam amitteret et si laicus intulerit clerico grauem uel enormem lesionem statim caperetur et si magna fuerit lesio incarceraretur castro Oxonie et ibi detineretur quousque clerico satisfieret et hoc arbitrio Cancellarii et Uniuersitatis Oxonie si clericus proteruus fuerit si minor uel leuis fuerit iniuria incarceraretur in uilla si clericus intulerit grauem uel enormem lesionem laico incarceraretur in predicto castro quousque Cancellarius predicte Uniuersitatis ipsum postulauerit si minor uel leuis fuerit iniuria incarceraretur in carcere uille quousque liberaretur per Cancellarium Et quod pistores et braciatores in primo transgressu suo non punirentur set de secundo amitterent panem et in tercio transgressu haberent iudicium de pillorio et quod quilibet pistor haberet sigillum suum et signaret panem suum per quod poterit cognosci cuius panis fuerit et quod quicumque de uilla Oxonie braciauerit ad uendendum exponeret signum suum alioquin amitteret ceruisiam et quod uina Oxonie communiter uenderentur et indifferenter tam clericis quam laicis ex quo inbrochiata fuerint et quod temptacio panis fieret bis in anno uidelicet in quindena post festum sancti Michaelis et circa festum sancte Marie in Marcio et quod assisa ceruisie fieret eisdem terminis secundum ualorem bladi et brasii et quocienscumque deberet fieri temptacio panis et ceruisie intersit Cancellarius predicte Uniuersitatis uel aliqui ex parte sua ad hoc deputati si super hoc requisiti interesse uoluerint quod si non interfuerint nec super hoc requisiti fuerint nichil ualeat temptacio predicta uos ut pro certo didicimus articulos libertatum predictarum in nostri contemptum et perturbacionem pacis nostre et tranquillitatis scolarium Uniuersitatis predicte minime obseruare curantes cartam nostram Uniuersitati predicte inde factam irritam reputatis et inanem quod mirantes et moti sustinere nolumus sicut nec debemus Et ideo uobis de consilio magnatum qui sunt de consilio nostro mandamus firmiter iniungentes quod sicut uos ipsos et omnia que in regno nostro habetis diligitis predictas libertates et alias quas ad utilitatem et tranquillitatem Uniuersitatis scolarium predictorum prouidimus et per cartas nostras concessimus eisdem sine dilacione inuiolabiliter obseruetis et in uilla Oxonie ab aliis faciatis obseruari ne pro defectu uestri ad uos et uestra tam grauiter capere debeamus quod inde uos senciatis non mediocriter esse grauatos et quod pena quam in hac parte merueritis reportare aliis [] castigatio alias delinquendi Teste me ipso apud Westm xxiii die Iulii anno regni nostri XLIII